شجرة العائله

شجرة العائله

السبت، 2 أبريل 2011

الحلقة الحادية عشر : الزيارة الغامضة


نزل خالد على عيادته

وأول ما وصل اتصل باروى علشان يطمن عليها

خالد : صباح الكسل يا اروتى

اروى بكسل وصوت نايم: صباح النور

خالد : شكلك مش فايقه لسه

هسيبك تكملى نوم وبعدين اكلمك

اروى : ماشى تصبح على خير

وسمع خالد صوت طرق على الباب

وكان السكرتير بيساله
دلوقت لو يحب يبدا

 ويدخل له الحالات اللى بره

ودخل له اول كشف

خالد وهو يطالع الاسم المكتوب أمامه فى ورق الكشف: أنسة ميار

ثم رفع نظره اليها مؤكدا على الاسم : مش صح برضه الاسم

ميار :...........

بص لها خالد وسألها متجاهل تماما تطنيشها :

حضرتك بتشتكى من ايه ؟؟

ميار:...............

صمتت فترة ثم التفت له ببطء ورفعت رأسها :...........

ما ان تلاقت اعينهم وحتى خفضتها سريعا

نظراتها كانت غريبة مالهاش تفسير عنده

خالد لنفسه:مش عارف ليه حسيت إن العيون دي انا شفتها قبل كدا.. عارفها كويس!! ...

ومع إني أول مرة اشوفها في حياتي

لكن من نظراتها ليا

احساسى انى اعرفها اتغلب عليا لدرجه انى لسه كنت هاقع

واسالها : احنا مانعرفش بعض قبل كده؟

بس لحقت نفسى وقلت : اتفضلى انا سامعك

ميار:...................

نظراتها أستفزتني

مش عارف ليه حسيت إنها بتكرهني

غريبة البنت ده

خالد فى عصبية:حضرتك جايه هنا علشان تسكتى؟

ولا حد واصف لك تاخدى لى صورة؟

ميار:................

وتنهد فى ملل :حضرتك قولى اللى بتحسى بيه علشان اقدر اكتب لك علاج ونخلص

فقالت بكبرياء : ومين قال لك انك ينفع تعالج حد؟

ثم اضافت فى برود وبطء: وسيادتك اكبر مرض

لهنا كانت طريقتها مستفزة جدا

وما اقدرش خالدانه يتحمل اكثر من كده

فوقف بكل عصبية وقال : اطلعى بره

ضربت مياربيدهاعلى المكتب بعصبية ووقفت

وقالت بحدة: قبل ما تغلط وتندم ...
 وضغطت على كلمة تندم
ياريت تفكر وتقولى اللى يخدع اهله

ويتقدم لبنات الناس وهو متجوز

وهيكون اب قريب

حضرتك توصفه بايه؟

خالد بدهشة : انتى يا بنتى مجنونة

ايه علاقه ده بيا؟

وبعدين مين اللى متقدم واب؟

وحسم خالد موقفه قائلا : اطلعى بره

ميار : انا اعقل منك ومن اللى زيك

قالت بتريقة : انا ماشية

ثم اضافت فى لهجة تحذيرية:بس اعرف ان حياتك تحت ايدي وقريب جدا هنتقابل

وياريت تتفرج على الهديه اللى انا جبتها لك معايا

ورمتها له على المكتب

وقبل ما تدى له فرصة يرد

سابت العيادة ومشيت

اخذ خالد يفرك يديه وهو فى قمه غيظه ان ما قدرش حتى يرد عليها

وتنفس ببطء مهدئا نفسه وهو يقول

مش عارف ليه سكت لها

فكرت إني أروح اخنقها بايدي

إني ابهدلها زى ما بهدلتنى فى العيادة

بس مسكت اعصابى بالعافية

وانا بستغفر واتنفس بعصبية

وعلى طول قمت اتوضا علشان اهدى شويه قبل الكشف الجديد

ومخى مش راضى يوقف تفكير فى البنت ده

وليه بتتكلم معايا بالطريقه ده ؟

اكيداحساسى كان مظبوط

هى تعرفنى بس منين ؟

وضرب بايده بعصبية على منضده الكشف

وحدث نفسه بصوت مرتفع قائلا: ايه اللى مخليها تكرهنى كده؟

***********

وحاول ان يركز فى شغله باى طريقه

وبعد ما انتهى اليوم

خالد

رجعت البيت وانا على اخرى مش عارف حتى سوقت ازاى

الحمد لله ان ربنا لطف من غير اى حادثه

والدة خالد : ايه يابنى قلقتنى عليك كل ده تاخير؟

خالد بعد ان قبل يد والدته : ما انتى عارفه ياست الكل

شغلنا مالوش مواعيد

والدة خالد : ربنا يقويك يابنى انت واللى زيك

خالد : ويخليكى ليا يا امى

وبعدين مش ناويه تعشينى ياست الكل ولا ايه

والدة خالد : عقبال ماتصلى العشا يكون العشا جهز

وبمجرد ان ذهبت والدته للمطبخ تناول الهاتف ليطمئن على

أروى

خالد : سلام عليكم

أروى: وعليكم السلام

خالد : ها اخبار الجميل ايه النهاردة

أروى بدلال: بس بقى

انا مخصماك ومش عايزة ارد عليك

خالد : لا ما اقدرش انا على زعل مراتى حبيبتى

اروى : لا ما انت قدرت خلاص

خالد : طيب اعرف بس الجميل زعلان ليه

اروى: ياسلام يعنى يهمك؟

خالد : اكيد

اروى: بقى لك كام ساعه ما سمعتش صوتى فيهم؟

خالد : ما انتى عارفه الوضع هنا يااروى

ولازم تتحملى معايا شويه

اروى : بس انا ....

قاطعها خالد : معلش اتحملى معايا

واوعدك ان كله هيتغير

اروى: امتى ياخالد؟

انا مش عايزة ابننا يتولد من غير ما والدتك تعرف

خالد : ان شاء الله

طمنينى بقى كلتى وخدتى دواكى؟

اروى: خدت دوايا

خالد : وكلتى؟

اروى : لا ماليش نفس

خالد : لا ياستى الكلام ده ما ينفعش

انا عايز ابنى ينزل حجم عائلى

الاوزان المينى بتاعت اليومين دوول ده ما تنفعنيش

اروى:ههههههههههه

ماليش نفس اكل لوحدى

خالد : ومين قال انك وحدك ما انا سايب معاكى راجل

وبعدين فين صاحبتك اللى كنتى بتكلمينى عنها

اروى: علا

اروى : ما انت شفتها معايا

خالد : مش فاكر المهم ابقى اعزميها تقعد معاكى

اروى : ما هى عندها برضه مامتها واخواتها

خاااااااااالد

خااااااااااااالد

وسمع صوت والدته بتنادى عليه

فقال بصوت خافت: طيب يا حبيبتى هاسيبك واكلمك

بكرة ان شاء الله

تصبحى على خير

اروى باستسلام: وانت من اهل الخير

وقام خالد لتناول العشاء مع والدته

خالد : الله يا امى تسلم ايديك

الواحد كان محروم من الاكل الطعم ده

الام وهى تربت على ظهره بحنان : الف هنا يا حبيبى

الف هنا

عقبال يارب ما تاكل من ايد مراتك

خالد : فى حياتك يا امى ان شاء الله

والدة خالد :وانا عندى لك حتة عروسه انما ايه

خالد : كح

كح

كح

كح

والدة خالد بقلق : سلامتك يا حبيبى

سلامتك

وناولته كوب الماء بلهفة

خالد وهو يغادر المائدة:ماتتخضيش يا امى ده شرقه عادية

الام : رايح فين مش هتكمل اكلك

خالد : لا شبعت الحمد لله

الام : يابنى كمل اكلك

كل عدل

خالد :كل ده واكل عدل

ده انا من كترالاكل كنت هموت

الام : بعد الشر

خالد : عنك وعنى يا امى

يالا تصبحى على خير لانى هلكان

وقبل راسها

ورمى بجسده المتهالك على سريره وعقله مازال يحلل ماحدث

وبعد دقيقتين

تذكر الهدية المزعومة اللى قالت انها جبتها له

وتناولها وفتحها ليعرف ما بها

ايه ده

c d

وصور له مع اروى

وصور له مع والدته

وصور له مع بعض اقاربه

ورقم موبايل

اكيد رقمها

امسك الرقم بعصبية وقام بالاتصال به

ياترى هيقول ايه ؟؟

ومين ميار؟

؟وايه علاقتها بخالد واهله

هناك 7 تعليقات:

  1. السلام عليكم اولا
    ثانيا انا مش فاهمة انتي بتتقلي علينا ليه كل شهر حلقة ده ما يرضيش ربنا
    ثالثا طيعا الحلقة حلوة و احداثها هاتعمل تطورات جديدة ومواجهات يعني القصة سخنت فامتتأخريش بقي الله يرضي عليك

    ردحذف
  2. وايزى!!!

    غيبه طوييييييييييييييله وحلقه قصييييييييييييييييره

    يرضى مين ده؟؟

    على رأى منى .. الأحداث شكلها هتسخن

    مستنيه .. بس مش شهر .. خليكى جدعه ونزلى حلقه بسرعه

    عاوزه اعرف مين ميار دى كمااااااان

    ردحذف
  3. منى ابو السعود وعليكم السلام ورحمة الله وبركاته
    الموضوع مش تقل صدقينى بس انتى عارفه الشغل هانت ان شاء الله اجازة قربت وهاظبط الامور شوية
    أسعدنى جدا رايك فى القصة
    ويارب تفضل دايما عجباكى

    ردحذف
  4. مها البنا وعليكم السلام ورحمة الله وبركاته
    كل ده قصيرة ياهااااااااااااااانم
    على الاقل بكتب
    تقولى ايه فى الناس اللى من فترة كبيييييييييييييييرة
    ما نزلتش اى حاجة
    احب اعرف راى سعادتك

    ردحذف
  5. لا وانتى الصادقة دول اكسل ناس مش اجدع ناس

    ردحذف