شجرة العائله

شجرة العائله

الجمعة، 3 ديسمبر 2010

الحلقه السابعة : انا بيتهيالى ..ولا ده حقيقة ؟؟؟؟؟؟؟؟؟؟؟؟؟


الحلقة السابعه




لازم أقرب وأتاكد

مش ممكن يكون الشبه للدرجه ده

علا لنفسها

( شبه مين يابنتى ما تكبريش الموضوع انتى اصلا ما شفتهيوش الا فى الصور )

خلاص حكمتى ان الشخص ده هو

ثم وجهت حوارها لسارة : معلش يا سارة خليكى هنا ثوانى وراجعه لك

سارة: انتى هتثيبنى وتروحى فين وانا رجلى مكثورة

علا : مكسورة ايه بس

ثوانى وراجعه لك

ولم اترك لها فرصه لاضافة اى كلمة

وبسرعة قربت للمكان اللى اتهيالى انى لمحته فيه

بس للاسف مالقتش اى حد

رجعت لسارة وانا مخى بقى دوامة من التفكير

واخيرا اقنعت نفسى انى بيتهيالى

مش ممكن يكون رجع مصر وماحدش يعرف

منك لله ياسارة

هو اليوم كان باين من اوله

اما كل ده حصل وانتى لسه ما قراتيش فاتحة

ربنا يعديها على خير لحد ما تتجوزى

علا : هتقدرى تقومى معايا ياسارة ولااوقف تاكسى وارجع لك

سارة وكانى غلطت فيها : اقوم معاكى ازاى وانا مكثورة

وتاكثى ايه اللى عايزانى اركبه .

علا بنفاذ صبر : امال سياده الكونتيسه تحب نروح ازاى ؟ 

نعدى على المتحف نجيب لك عربيه تحتمس الثانى ونشوف لنا كام حصان يجرها





سارة : انتى بتتريقى ياعلا

علا: انا

لا.. ابدا

اخص عليكى ما تفهمنيش صح يا ثارة

نظرت لى سارة شذرا وانا انطق اسمها بنفس لدغتها

و كل اللى قلته الاول ولا خدت بالها منه

ثم اردفت فى خيلاء : لا انا اتصلت على زوما وهو هيجى ياخدنى

ابقى تعالى معانا ممكن نوصلك

علا : مين ؟؟

زوما .

ده توك توك نوع جديد

سارة فى انزعاج واضح: علا

توك توك . ايه بس .

علا : معلش ممكن توضحى لى انتى عارفه ان فهمى على قدى

(وقعدت اراجع اسماء قرايب سارة اسم.. اسم

اللى اعرفه واللى سمعت عن وجوده

المشكله ان الاسم مش غريب

ممكن اكون سمعته فى اعلان لبان

صورايخ اطفال

اه فى لعبه اسمها كده

وهززت راسى فى نفى : لا....لاده كان اسمها ...

لا هى اللعبه اللى فيها الكور

هو الاسم مش غريب عليا

فقررت انى اريح نفسى

وبسرعه طبعت الابتسامة البلاستيك

على شفايفى وقلت لها:

معلش ياسارة قلت لى: ل مين اللى جاى ياخدك ؟؟

سارة : اووووه ما تركزى شويه.. قلت لك زوما

وممكن اخليه ياخدك معانا

علا : ربنا وحده اللى بياخد

احممم احممم

اقصد وعلى ايه انا اعرف اروح وحدى

وسكتنا

وصممت انى مش هاسال تانى

انا هاعرف لوحدى

وقلت يمكن تكون خدمة جديده زى خدمة تاكسى العاصمة

اه

ممكن ليه لا

وبعد ساعه ونصف

هبت حتة عاصفة ترابيه


انما ايه

بس الغريب ان العاصفه الترابيه مليانة دخان عوادم

كح كححكحكحكحكح

ايه انتى فين ياعلا ؟

انا هنا ياسارة

كحكحكحكح

ايه ده ؟

وشويه والرؤيه بدات توضح

وسمعت صوت بيقول سلام عليكم

ولقيت سارة بقدرة قادرة

صوتها انخفض بزوايه 180 درجه

وكأن حد عمل لها

Mute

وبما ان سحب الدخان والتراب بدات تهدا والرؤيه وضحت نسبيا من حوالينا

فقلت ارد السلام

ما هو رد السلام واجب

لسه هرد

لقيت سارة بتقول : اعرفكم

علا جارتى

البشمهندث زوما خطيبى

مهندث ميكانيكا قد الدنيا

بصيت قدامى ما شفتش اى حاجة

ولو انى مميزة ببدله اقصد بنطلون بدلة

رفعت عينى لفوق وصلت للقميص

رفعت عينى كمان

كمان

يااااااااااا

هو ده بدا خطيب سارة

لك حق يا بنتى انك تلبسى كعب

رفعت راسى وعليت صوتى علشان يوصل لفوق عنده

وعليكم السلاااااااااااااام ورحمة الله وبركاته

وطبعا بما انى مش عارفه اسمه ومايصحش انى انطق الاسم اللى بتدلعه به سارة

فاكتفيت برد السلام

وسكت

البشمهندس : خيى ياساية

ايه اللى حصل خضتينى

(علا لنفسها ما جمع الا لما وفق خير بقت خيي

الله عليكم ونعم الدويتو )

سارة بمنتهى التاثر : شفت يازوما

رجلى انكثرت

خطيبها قصدى اللى لسه هيكون خطيبها : الف سلامة عليكى

تحبى نيوح لدكتوى

سارة : لا

انا عايزة اروح البيت

البشمهندس : من عيونى

انتى بس تطلبى وانا عليا انفذ

علا : احممممم احممممممم

طيب استاذن انا بقى

البشمهندس : لا ازاى احنا لازم نوصلك

مش حضيتك جاية ساية

تنحت شوية بعدين فهمت انه يقصد انى اكون جارة سارة

علا : اه احنا جيران

بس مافيش داعى للازعاج

البشمهندس : ولا ازعاج ولا حاجة

سارة : ماتلحش عليها يازوما

ثيبها على راحتها علشان ما تتضايقش

علا لنفسها بقى كده

طيب والله لا اركب معاكم ومش هاسيبكم من غير محرم

سارة : شكرا لذوقك يا بشمهندس

وبما انى طريقنا واحد يبقى ما فيهاش ازعاج

ومسكت ايد سارة وانا بابتسم بكل استفزاز

هاتى ايدك ياسارة واسندى عليا

علشان تعرفى تركبى العربيه

البشمهندس : طيب هسخن العيبيه




وبمجرد ما بدا يدور العربيه عرفت انها عامل اساسى

فى زيادة مشكله التلوث فى مصر

وفهمت ايه سر العاصفة الترابيه اللى هبت فجاه بدون انذار

وركبت معاهم

وماحبيتش أرخم عليهم اكتر من كده

فقررت انى اتصل على اروى اشغل نفسى عنهم شويه

علشان ما احرجهمش

علا : سلام عليكم

أروى : ازيك يا علا

فينك يا بنتى

علا : فى الدنيا

يعنى هكون فين

انتى فى البيت اعدى عليكى شويه

اروى : بعد ساعتين هكون فى البيت

علا : اعترفى يا ندله خارجة ولوحدك ومن غير ما تقولى لى

ونخرج سوا

اروى بدلع : انا مش لوحدى

علا : اه الانا بقى هتشتغل

يا بنتى هو انتى تعرفى حد فى البلد ده غيرى

اروى : اه

انا خارجة مع جوزى حبيبى

علا : حمد لله على سلامته

هو رجع امتى ؟؟

اروى : من كام يوم

علا :وانا اقول اروى اختفت ومش بتسال

من لقى احبابه يا ستى

طيب يالا اسيبك معاه

اروى : هتعدى عليا امتى

علا : بذمتك انتى عايزانى اعدى اصلا

اروى : اه طبعا

هاستناكى

علا : لا خليها مرة تانيه

وفجاة افتكرت علا اللى لمحته من شويه

حاولت تتاكد منها من غير ماتثير شكوكها

علا : طبعا ما صدقتى جه علشان تاخديه وتتفرجى على الفيلم اللى هتموتى وتشوفيه

اروى : لا يا ستى ده احنا فى وسط البلد

بنشترى هدوم للبيبى

علا : وسط البلد

اروى : اه

علا فى زيادة تاكيد : رحتى المحل اللى شفناه انا وانتى الاسبوع اللى فات

سارة : لسه ما شيين من عنده من ربع ساعة

اشترينا كل الحاجات اللى فيه

هنا ايقنت علا انها لم تتوهم


وانها رأت اروى فعلا

لكن هل من راته مع اروى هو نفسه من تظنه انه هو

تابعوا معانااااااا









الخميس، 18 نوفمبر 2010

الحلقة السادسة :تابع يوم مع ثارة

فضلنا نبص على المحلات


وفجأةوانا بكلم سارة حسيت ان الهوا جنبى حصل فيه خلل مش عارفه ليه؟؟


وسمعت دوشه وشفت حاجة من بعييييييييييييييييييييييييييييد


خير اللهم اجعله خير!!!!


ايه اللمعان ده؟؟


 !!!!!!!!!!تكون الارض بقت مُشعة


ااااااااااااااااااااالله


وابقى اول مصريه شافت اليورانيوم المشع فوق سطح الارض مش تحته

ايه ده استنوا كده

الوان الكتله المُشعة ده مش غريبه عليا

تكونش ده سارة ؟

بس ايه اللى مقعدها

اقصد اللى مكومها بعيد ؟؟

اما اقرب واروح اشوف

وعقبال ماعرفت اخترق الصفوف وربنا فتحها عليا

وقدرت اوسع لنفسى مكان علشان اشوف

وأتاكد من الكومة اللى على الارض

ولو ان اللمعان اللى انا شايفه مأكد لى انها سارة

بس برضه اقرب واشوف

وفضلت اجاهد واعبر بين الناس

لحد ماشوفت اللى شفته
*************
لقيت سارة موطية تبوس رجل الراجل اللى قدامها

لالالا مش للدرجه ده ياسارة

لو عايزة فلوس اسلفك عارفه انك داخلة على جواز

بس مش للدرجة ده

وقلت لازم اسحبها من على رجله

واقولها ما تعملش كده ابدا

ولسه باقرب وهاشدها وانا محضرة لها كلمتين

لقيت الراجل اللى هى اترمت على رجله بيقولها

معلش يا بنتى تعيشى وتاخدى غيرها

ماهو لازم تتقلبى بالكعب الاربعة دور اللى انتى لابساه

ساعدتها انها تقوم وقلت لها

علا : ايه اللى حصل ياسارة

سارة وهى خلاص على اخرها: الحقينى ياعلا وانا بعدى الشارع

كنت عديت والله

عديت والحمد لله

ولسه برفع رجلى علشان اطلع على الرصيف

مش عارفة اية اللى جرالى اتشنكلت الشنكلة اللى انتى شايفاها


برفع بعينى لقيت نفسى واقعة على رجل الراجل الواقف ده

علا : ده انا افتكرتك بتبوسى رجله

سارة : ده وقت هزارك

قعدت انفض فيها :ياخبر ايه اللى دلقك كده ياسارة

(حاولت امسك نفسى من الضحك)

بصعوبة

اقصد ايه اللى وقعك

سارة: شكلى اتحثدت ياعلا

الناث مش قادرة تنزل عينها من عليا

جابوا اجلى

علا : وهى عينهم تقدر تاثر فيك وانتى مزغللاها بالاضواء النايلون بتاعت البلوزة

سارة : قولى ماشاء الله

علا( والله اسيبك وامشى انا غلطانة) : ماشاء الله

وسندتها برفق : حاولى تقومى معايا

سارة: حاثبى بالراحة

علا : اللهم طولك ياروح

علا: تقدرى تمشى على رجلك

سارة : احاول
ولسه بتدوس على الارض
اكتشفت ان الهانم لابسه فردة واحدة بس وكعبها مكسور

طيب فين الفردة التانيه؟؟؟؟؟؟؟؟؟؟؟؟

سندتها لحد ما قعدتها بعيد شويه

ورحت ادور على حذاء الثندريلا ثارة

يارب عدى اليوم على خير

ومسكت الفاردة المكسور كعبها فى ايد

و فى الايد التانيه بازيح الناس اللى قاعدة تتابع الفيلم الصباحى اللى ببطولة ثارة وعلا

وفضلت ابص حواليا يمكن الاقيها

مافيش

ادقق تانى وابص كويس برضه مافيش
فايدة

وعلشان الناس ماتفهمش غلط وتقول انى اتجننت

قلت بصوت عالى نسبيا وبمنهتى الحرج : احمممم محدش لقى فاردة تايهة ياولاد الحلال
؟؟؟؟؟؟؟؟؟؟؟؟؟؟؟؟؟؟؟؟
الناس صراحه ماقصرتش

اللى يقول لى: ولما انتم مش قد الكعب بتلبسوه ليه

وواحد يقول :مش عاجبكم العجب ياستات وبتعترضواعلى خلقة ربنا

ماله القصر

حد يلبس كعب بالشكل ده اهو ربنا جزاكم

علا :لاحول ولا قوة الا بالله

انا باسال عن الفردة التانيه مش باطلب فتوى شرعيه فى لبس الكعب

المهم سمعت صوت مسرسع مخنوق كده بابص فى مستوى نظرى ماقدرتش احدد مصدره

رجعت ابص على الشوز لقيت الصوت أقرب وأوضح كمان

وحسيت بثقل فى الجيبه وكان الجاذبيه الارضيه سابت الناس كلها

وركزت مع جيبتى

ببص على مركز الجذب لقيت ايد صغنونة بتقول لى :




ياطانت ياطانت


علا: .........




حضرتك بتدورى على اخت اللى فى ايديكى ده

علا : ايوة ياحبيى ما لمحتهاش ينوبك فيا ثواب

الولد:اه يا طانت انا شفتها كانت بتطير
 لما طانت اختك كانت

وقعت على الارض

علا : طيب مالمحتش طارت فين

الولد: لا لمحت

ما انا كنت بالعب كرة انا وتامر صاحبى

وهو مسكها بايده لما طانت شاطتها من رجلها

علا : طيب ممكن تروح تجيبها من صاحبك يا حبيى

الولد:لا يا طانت ماهو تامر افتكر طانت مش عايزاها وزهقت منها وشاطتها

فلعبنا بها احنا كمان بدل الكرة اللى خدها عمو حسين علشان كسرنا إزاز المحل بتاعه

علا بنفاذ صبر: طيب حدفتوها فين اخر مرة

الولد : تامر شاط شوووووووووطة جميله كانت هتدخل فى الجوون على طول

بس

علا : بس ايه ياحبيبى انطق

الولد: العربيه صدتها فوقعت تحتها وداست عليها

لو حضرتك عايزاها تامر صاحبى رماها فى الصندوق الاسود الكبير اللى هناك

علا:.............


الصندوق ده

الولد: ايوة يا طانت ماما قالت لى ما ارميش حاجة فى الارض

لازم ارميها فى الباسكت

علا : فى الباسكت

وجريت على سارة وانا على اخرى طبعا

سارة : لقتيها ياعلا

علا : لا

سارة : اروح ازاى انا كده

علا : هناخد اى تاكسى لحد البيت

سارة : انا لثه ما خلصتش

علا : عندك حل تانى

سارة : اه اروح انا وانتى تكملى

علا( ده على اساس انى انا الفلبينيه بتاعت سعادتك ): لا يا حبيتى لازم تجيبى حاجتك بذوقك مش انتى العروسة

وطبعا الكلمة ده سكتتها

وبدات محاولات ايقاف تاكسى فى الصبا ح الباكر

علا : حاولى تسرعى شويه يا سارة الله يبارك لك

عقبال ما بنوصل للتاكسى للى وقف لنا بيكون زهق ومشى

وده رابع تاكسى نحاول نوقفه

سارة :يعنى اعمل ايه مش شايفه رجلى

اموت نفثى يعنى

علا فى نفسها( لا وده تيجى اطق انا واموت بغيظى



علا :حاضر ياسارة

على اقل من مهلك

وكأن سارة ماصدقت كلمه اقل من مهلك ده ومسكت فيها

وشدت الفرامل ولغت السرعة وبدأت تقلد السلاحف بالظبط

كان ناقص أغنى لها تاتة خطى العتبة

تاتة حبة حبة

وانا بادور وشى عن سارة بدل ما اتهور واسيبها فى الشارع واروح لوحدى

لمحت حاجة غريبه جدا

ايه ده ؟

مين اللى مع اروى ؟

انا عارفه الشاب ده

شكله مش غريب عليا

بس ازاى يكون فى القاهرة

المفروض انه فى امريكا ومش راجع دلوقت

وايه اللى موقفه مع اروى ؟



الجمعة، 29 أكتوبر 2010

الحلقة الخامسة :مع ثااااره .. اليوم الأول



وبعد ما ماما وطانت اصدروا فرمانهم بتعيينى الوصيفه الرسيمة للكونتيسة سارة حفظها الله ورعاها .. 

وطبعا لم يتضمن القرار اى حق للاعتراض لاسمح الله 

وحان الان موعد تنفيذ الحكم حسب التوقيت المحلى لدماغ سارة 

صحيت الصبح ويدوب باصلى الضحى ولسه هامسك المصحف اقرا الورد بتاعى لقيت تليفون البيت بيرن

عملت نفسى ولا كانى سامعه

بيتنا ماشاء الله فيه 3 غيرى اشمعنى انا اللى ارد؟

(تصحيح اقصد اتنين لان أنس عمره ما هيفكر يتعب نفسه ويرد على التليفون)

الا لو كان الحاج والدنا بيسال عايزين ايه على العشا وانا راجع

المهم تحت الحاح الجرس قمت وسلمت امرى لله ورديت


علا : سلام عليكم

المتصل : وعليكم الثلام ورحمة الله

علا لنفسها اااه هى الثلام ماتجيش غير من ساره

سارة :  ثباح الخير
علا فى نفسها ويجى منين الخير : صباح النور ياسارة

سارة : انتى لثه ما جهزتيش

علا :بدرى اوى يا سارة مستعجله على ايه؟ ده لسه الساعه 8

سارة: علشان  نلحق نلف نشترى الحاجات من بدرى عقبالك

علا : يا بنتى ننزل فين هو فى محلات بتفتح دلوقت

سارة : لا ما أنا عايزة اخد رايك فى الفثتان وكام حاجة كده فياريت تعدى عليا وننزل ثوا من عندنا

علا : طيب ياسارة ان شاء الله

علا : سلام

سارة : مثتنياكى ما تتاخريش


ان شاء الله وقفلت السماعه وانا مش طايقه نفسى
 حد يلف فى الحر ده من بدرى كده؟


والدة علا :  صباح الفل ياعلا

علا : صباح النور يا ثت الكل ... يووووووه باين انى  اتعديت منها
 الله يسامحك يا سارة

والدة علا:هو التليفون كان بيرن ولا انا اتهيالى

علا : كان بيرن؟
وهززت راسى فى استنكار: لا ياحاجة يرن وده كلام ؟ ده  بس كان بيتهيالك

والدة علا : ......

علا : اصله مش رن!! .. ده مبطلش رن

والدة علا : على الصبح كده
 خير مين اللى كان على التليفون

علا : ثارة بتثلم عليكى

والدة علا : اقعدى عيبى عليها لحد ما تيجيبى عيال لدغة زيها

علا : ليه ياماما كده بس انا زعلتك فى حاجة

والده علا وهى تتجاهل الرد عليها  : وكانت عايزة ايه من بدرى اوى كده

علا : كانت عايزة تلحق توزع اللبن

والدة علا : .... ايه؟

علا: قصدى يعنى انها كانت بتنفذ فيا حكم التدبيس بتاعك
 عايزانا ننزل نلف على المحلات

والدة علا : يا بنتى البنات لبعضها
عقبال ما تتعب لك يوم فرحك

علا : يا ستى ولا تتعب لى ولا اتعب لها
ربنا بس يعدى اليوم على خير
لانى انا وثارة مش بنتفق ابدااااااا

ومسكت مصحفى علشان اقرا وردى
وادعى ربنا يصبرنى على ما بلانى
انا اخرج مع سارة؟ ربنا لا تحملنا ما لاطاقة لنا به
خلصت ولبست وطلعت عند طانت زكيه

*****************

سارة فى إستنكار: اتاخرتى عليا ليه ياعلا؟؟ مش عارفه ان وراكى لف كتير؟


(استغربت جدا لكلمه وراكى بس قلت ياواد طنش خاااالص)


علا : معلش ياسارة المهم ياعروسه تحبى نبدا بايه؟

خرجت لى سارة وهى تقريبا ماسكه محل ملابس متنقل فى ايدها
اول مرة اشوف التنفيذ العملى لللبس المحمول

سارة:الاول قولى لى البث ده ولا ده؟
ولا اخد الجيب ده على الجاكت ده
ولا اقول لك البنطلون ده على الشميز ده

 همست فى سرى: اللهم طولك ياروح: البسى  اى حاجة مريحه علشان هنلف كتير
مش لازم يعنى حاجة كلاسيك اى كاجول مريح ومشى حالك

وفجاة لقيت سارة دورت لى راسها وبصيت لى باستنكار
وكانى شتمتها بالظبط لدرجه انى شكيت فى نفسى ورحت اعيد الكلام اللى قلته على ودنى تانى


سارة : انتى عايزة العروثه تلبث اى حاجة تمشى حالها

علا : هما منعوا العرايس يمشوا حالهم باى حاجة الايام ده؟

 سارة : طبعا انا لازم اكون احلى واحدة
كل الناث لازم تشوف العروثه ده قمة الشياكة

علا : اقصد بس تلبسى حاجة مريحه .. ماقلتش البسى طقم من عند مرات عم عبدو البواب
البسى حاجة من عندك تريحك فى اللف

سارة:يا ثلااااااااام

علا بنفاذ صبر:اقول لك البسى اللى انتى عايزاه

ورحت اسلم على طانت علشان تلبس براحتها
 واخد الصدمة انا وطانت مرة واحدة
ثم قلت لنفسى بصوت عال: واخدها لوحدى ليه؟ 

*****************

وبعد ماسلمت على طانت زكيه


طانت زكية:ها ياعلا اتفقتوا هتعملى ايه؟


علا فى نفسها (تعملى) هى الناس دى مال الضماير عندها متلغبطه كده ليه؟
إسمها (هتعملى) برضه؟  نعديها المرة ده : لا ياطانت لما سارة تلبس نحدد سوا ان شاء الله

ويعدين لقيت طانت عينها بتلمع اووى وبعدين بقها انفتح لغاية رقبتها وهى بتقول على طريقة عبد الفتاح القصرى : اللهم صلى على النبى
اللهم صلى على النبى
يأرض احفظى ما عليكى


الحقيقه مكانش ناقص غير انها تقول .. يا صفايح الزبده السايحه

 بسرعه بصيت على الارض ما لقتش حاجة

لفيت بعينى اشوف طانت بتشوف ايه يمكن التلفزيون بيذيع برنامج لنانسى ولا اليسا

لقيت ايه؟

خير اللهم اجعله خير 
(أصل الدعاء واجب فى الحالات اللى زى ده)

 لقيت لكم سارة خارجه لابسه طقم كلاسيك وعليه حته شووز كعب 10 سم

لا ومش  كده وبس ده لافه 4 طرح فى بعض اسبانش


قلت فى براءه : ده وقته تعملى بروفة لطقم الشبكة؟

سارة :بروفة ايه بس؟

علا : ااااااه عرفت .. يبقى ده الطقم اللى هتلبسيه لما تخرجوا سوا بعد الخطوبة

سارة : لا طبعا

علا : ؟؟؟؟؟؟؟؟؟؟؟

سارة: يالا بقى علشان ما نتاخرش

علا : طيب البسى انتى

سارة : ما انا لابثه اهو

فاضل بث اخد شنطتى معايا


علا : هتنزلى بلبسك ده الساعه 9 الصبح

سارة : ايه رايك؟؟ مش باين عليا انى عروثه بذمتك؟

ما علينا .. 
كل ده يعدى والواحد يقدر يتحمله 
لكن اللى مايعديش ابدا
السيموفنيه اللى بتعزفها اتوماتيك اول ما تتحرك
واللى انا عجزت احدد مصدرها وكنهها
ممكن يكون  صوت اطباق بتخبط فى بعض
او حانطور ماشى بحصان بشخاليل


علا : مع كل الفرح ده ؟ اكيييد باين


والده سارة : قمر عرووووسه يا حبيتى
اسم الله عليك
ولا ايه ياعلا؟؟؟؟

علا : ايه .. آآ قصدى ااااه طبعا


علا لنفسها:  انا متهيالى لو تطولى ياسارة  تحطى تكت على ظهر البلوزة و تكتبى عليه (انتبه العروسة امامك ..  قف ولاتجرى للخلف)
وابتسمت وانا اتخيلها كذلك ثم خفت تسالنى بتضحكى ليه احسن تعجبها الفكرة وتنفذها فداريت ابتسامتى بسرعه ثم أردفت:


حد يلبس بلوزة بتلمع وكعب 10 سم الا لو كان عروسه؟ أنا هاسبقك تحت

وخرجت وانا بادعى ياااااااااااااارب عدى اليوم ده على خير

*****************


واول مانزلنا من البيت

علا: ها ياسارة تحبى نروح فين

سارة :الاول انا هعدى انا وانتى على الاتيليه
وبعدين انا عندى ميعاد الثاعه 11
علشان  الكوافير والماثكات

علا :اه الساعه 11 ولما الميعاد الثاعة 11 ماقلتيش ليه وانا اجى لك بعد الكوافير؟

سارة : لا ماهو انتى مش فاهمة

علا : خير ؟؟ فهمينى

سارة : انا عندى ميعاد مع الكوافير
بس انتى هتشترى لى بقيه الحاجات على ذوقك

علا : نعممممممممممممممممم !!!

سارة : انا واثقه من ذوقك يا لولو ياحبيى

علا بإنزعاج من هول الصدمه: ايه لولو ده؟
ايه الدلع الكلابى ده؟


وضغطت على اسنانى وانا بااقول بمنتهى اللطف المصطنع :لا ياستى انا بقى مش واثقه من ذوقى


وبعد حوالى نصف ساعه من اللف لاحظت ان سارة مشيتها غريبه

فقلت فى نفسى : معقول تكون الفرحه مخليها ترقص وهى ماشيه؟


لالالالا مش ممكن ربنا يكملك بعقلك ياسارة ان شاء الله لحد ما نوصل بيتنا

علا: سارة؟

سارة: ممممم

علا : انتى تعبانة؟

سارة : لا ابدا

سكت وفضلنا نبص على المحلات وفجأة بكلم سارة حاسه ان الهوا جنبى حصل فيه خلل مش عارفه ليه
وسمعت دوشه وشفت حاجة من بعيييييد خير اللهم اجعله خير لابسه حاجة بتلمع
تكونش ده  سارة ؟

 ي
ت
ب
ع

ونشوف ايه اللى حصل لساره وحكايتها مع الحذاء ال 10 سم

السبت، 16 أكتوبر 2010

زوار مدونتى


السلام عليكم ورحمة الله وبركاته











زوار مدونتى الكرام اعتذر بشده عن انقطاعى المتزايد عن حده عن المدونة وده طبعا بسبب رقى وتقدم الخدمة النتية



ماشاء الله الخدمة فى تحسن مستمر



وعملا بمبدا حسن الظن اتصلنا بالشركة علشان



نعرف سبب الانقطاع الدائم



وصدق او لاتصدق



طلع الانقطاع بسبب تحسين الخدمة



اه تصدقوا تحسين الخدمة دلوقت بقى بقطعها الدائم



ده التطور الطبيعى للتحسين



مش انتم بتشتكوا انها بتجى وتقطع



طيب احنا هنوحد الخدمه هنقطعها من غير ما تيجى بلا وجع دماغ





واضح ان الخدمة معصلجة معاهم شويه







اعتذربشده



ودعواتكم لنتى تعاطفكم وحده مش كفاية