شجرة العائله

شجرة العائله

الأحد، 19 ديسمبر، 2010

الواجب الثانى :علشان ماحدش يقول انى كسلانة



الواجب ده وصلنى من الاستاذة: منى ابو السعود

  صاحبة مدونة تخاريف عقل وقلب 
بمعنى اصح  لو حد اتخنق او زهق
فهى السبب هى اللى بعتت الواجب ده ليا
يالا استعينوا على الشقا بالله وتعالوا صدعوا معايا شوية
السؤال الاول : عرف الكاتب و اذكر نبذة عن تاريخ حياته ؟

حاسه بالسؤال ده كانى قاعدة فى السجل المدنى
ماعلينا
الاسم والسن والعنوان

ابدا بالاسم :نهى عبدالمعز الليثى

السن : ولو انى كان نفسى اعمل زى البنات
احاول اقلدهم يعنى
واقول حد برضه بسال بنت عن سنها

بس على ايه الحيرة ده
واوجع دماغكم معايا على ايه

متهيالى كده نسيتم السؤال كان اصلا عن ايه

عدوه بقى

المهنة : اكيد كلكم عرفتوا ...... مُدرسه

لو تحبوا تعرفوا مدرسه ايه ؟

اكتر مادة اغلب الناس مش بتحبها هى اللى بدرسها

مدرسه math
العنوان:القاهرة
صفات الكاتب :عيبى العصبية بس الاهم انها مش بتخرج الا بعد فترات تحمل كتيييييييير وبعد استنفاذ طاقتى كلها فى الاحتمال
**************
السؤال التاني : متي بدأ الكاتب نشاطه؟

من 2004 بس كانت محاولات وخواطر
***************

السؤال الثالث : ما الدافع وراء ارتكاب هذه الجريمة
 " قصدي المدونة "
عدة اسباب

كنت دايما بالاحظ ان الناس بتحاول تقلد بطل القصة او المسلسل فى الافكار
والكلمات
ودايما لما يتحطوا فى موقف ممكن ياخدوا نفس ردة فعل بطل
القصة او الفيلم اللى تابعوه

ففكرت انى اكتب قصص تقدم فكرة وفى نفس الوقت يكون فيها افكار دعوية

واربط الدين بالحياة ومن هنا جت لى فكرة هل لنا ان نعود ؟

واللى كانت سبب بمعرفتى بناس كتير من اهمها

نهى صالح صاحبة مدونة كلام فاضى

واختى فى الله
 دعاء محمد الشبرواى صاحبة مدونة رسالة على فراش الموت

والاستاذ مجدى حاتم صاحب مدونة افكار وكلام

واختى الحبيبة
مها البنا صاحبة مدونة الطير المهاجر
*****************
السؤال الرابع : لماذا تكتب و ما هي طموحاتك ؟

بكتب علشان....... اعبر عن نفسي و مشاعري

وكمان من باب الدعوة

هتقولوا لى ازاى؟؟

هقول لكم انا متاثرة جدا بالاية
( ادع الى سبيل ربك بالحكمة والموعظة الحسنة)

يمكن فى يوم من الايام حد يتنفع باى كلمة باقولها

وتكون ليا فى ميزانى وقت الحاجة

علشان كده كنت بافرح جدا لما حد يقول انه استفاد او اتعلم حاجة من قصة هل لنا ان نعود ؟

وعندى هدف تانى اهم

نفسى بجد احققه نفسى الدين يكون كل حاجة فى حياتنا

ونعرف انه مش تعصب خالص

---------------------------------

صدعتكم على الاخر 
بس انتم اللى طلبتم

صديقتى منى ابو السعود انا كده عملت الواجب اهو
علشان تعرفى انى مش تلميذة كسلانة
دمتى بخير




السبت، 18 ديسمبر، 2010

وادى اول واجب فى المدونة



وصلنى الواجب من صديقتى العزيزة نهى صالح صاحبة المدونة المتالقة كلام فاضى
بس ما اقدرش ارفض لنهى  اول طلب
ياالا تعالوا بقى اصدعكم معايا شويتين تلاتة
السؤال الاول
هل أنا فضوليه وباحب اتدخل فى شئون الاخرين؟
  بالعكس الفضول من الصفات المكروهة جدا ليا
بس نفسى الاخرين هما اللى يبطلوا يتدخلوا فى شئونى
بس التجربه اثبتت لى صدق مقولة ليس كل ما يتمناه المرء يدركه
بمعنى لا انا هبطل اكره الفضول 
ولا هما هيبطلوا يدخلوا نفسهم فى امورى 
السؤال الثانى؟
الاسئلة التى تستفزنى
ممممممممممم مش عارفه احدد
لانى صعب انى استفز بسرعة
بس ممكن مثلا لو موبايلى رن 
وانا مع زميلتى
وتسالنى مين
وكانها عارفة كل الناس اللى اعرفها ده ابسط مثال بس متهيالى بيتكرر مع اغلبنا  
اولما حد يتناقش فى الدين عن جهل
ومصر على الخطأ
وتلاقيها بتسالك بكل تصميم وثقة فى الراى
وعرفتى منين ومتاكده كده ان حجاب الشعر هو اللى فرض
مش يقصدوا الحجاب المعنوى
اعتقد ان السؤال ده كمان  هيستفزكم معايا
وده اخر حاجة انا عايزها
طولت عليكم

الثلاثاء، 14 ديسمبر، 2010

الحلقة الثامنة :لغز اروى :




ماما : ايه ياست علا كل ده تاخير؟

علا : الحمد لله اننا رجعنا اصلا

أصل ماشاء الله حظ ثارة عالى أوووووى

رجلها اتجزعت

والكعب اتكسر

وماجبناش اى حاجة

غير الالتهاب الرئوى اللى جالنا من المدخنة المتحركة الى ركبنا فيها
 

والدة علا: ليه بس ؟

علا : وده سؤال برضه مش باقول لك ده حظ ثارة

اقوم انام شويه لانى وعدت أروى اعدى عليها

والدة علا : هى كل يوم اروى

علا : يا ماما انا رحت لها اصلا

ولا انتم بتحسبوا مكالمات التليفون عليا

هى صاحبتك هترجع امريكا تانى امتى؟

علا : ليه بس ياست الكل هى مضايقكى فى حاجة

ووالدة علا : كل يوم خارجة من البيت وكمان بكرة رايحه عندها

والبيت ولا كانه فى بالك

علا : بس كده وانا ما اقدرش على زعل الجميل

ودقايق والبيت كله يبقى فى بالى

زى ما انتى عايزة

والدة علا : واعملى حسابك بكرة مافيش خروج

خالتك جاية تزورنا بكرة

علا : وايه المشكله ما خالتو بتزورنا على طول

هاجهز الغدا واسلم عليها

واروح اقعد مع اروى انتى عارفه انها لوحدها ومالهاش حد

والدة علا :يا بنتى هى مش معاها جوزها

علا : اه بس طول النهار فى شغله

والدة علا : عقبالك يارب كده لما افرح بيكى

علا : قلت لى خالتو هتيجى الساعة كام؟



والدة علا : طيب قولى امييييييييين

قولى ياااااااااااارب

اى حاجة

علا : ياااااااارب

ياااااااااااارب قوى ايماننا

والدة علا فى نفاذ صبر واضح وهى بتجز على اسنانها : اعملى
حسابك هنعمل اصناف كتير


علشان عايزة خالتك تشوف انك ست بيت ممتازة

علا : ماما يا حبيبتى ابعدى عن خالتو

ها ياحبيبتى

بلاش تجربى فيها اكلاتك الغريبه اللى انت بتعمليها
الست لسه مافرحتش بابنها

ووجهت اليها نظرة ذات مغزى ان شاء الله ربنا يفرحنا به قريب
علا: هى تفرح اه 
بس  
احنا مالناش دعوة
والدة علا فى تحفز: ليه يعنى ؟؟
هو هيلاقى احسن منك وبعدين خالتك لمحت لى كذا مرة

علا : يا ماما الله يهديكى

بلاش الكلام ده

والدة علا : بلاش الكلام ده ياماما!!؟؟؟

هتفضلى كده لحد امتى

الله يهديكى ياعلا

علا : اميييييين ياماما

*********************

وطبعا علشان اخلص نفسى من تلميحات ماما

كان لازم اظبط البيت واطير جرى على اروى حبيبتى

اللى صممت اننا لازم نتغدى سوا

علشان تورينى اخر اختراعاتها الطهوية


ترررررررن تررررررررررررن
 

أروى: معلش ياعلا ممكن تردى على الفون

علا : شغلونا عندكم بقى

ماكنتش عزومة غدا اللى هتشغلونا بيها

علاوهى ترفع سماعة التليفون

علا : سلام عليكم

خالد :وعليكم السلام ورحمة الله وبركاته

خالد وهو يعاود التاكد من النمرة التى اتصل عليها: مين معايا

علا فى لماضة واضحة: حضرتك االى متصل

حضرتك اللى تقول انت مين

خالد : مش .....مش ده منزل مدام أروى

علا : اه ثوانى اناديها لك

نقول لها مين برضه ؟؟

خالد : خالد

علا فى احراج : اهلا وسهلا حمدا لله على سلامتك يادكتور

خالد : الله يسلمك

ممكن اعرف بقى مين معايا

علا :انا زميلتها

ثانية واحده اناديها لك

وكان لازم اختم بالجملة التلقيديه : مصر نورت يا دكتور

خالد : منورة بأصحابها

ورحت اديت التليفون ل أروى

وانا محرجه جدا من العك اللى عكتيه

استاذنت اروى من علا لترد على زوجها

وبعد ان انهت المكالمة

اروى : معلش ياعلا اسفة سيبتك وحدك

علا : لا ياستى ولا يهمك

وبعدين يعنى بذمتك مين اللى يتساب انا ولازوجك

اروى : جوزى طبعا ده انا ما صدقت شفتك

علا : اه على يدى

والتجربه خير برهاااااان

اروى :هههههههههه لا مش خير برهان

انا بس مش متعودة منه يكلمنى فى الوقت ده لانه ميعاد شغله

بس هو لقى نفسه فاضى فحب يعدى عليا

علا : طيب استاذن انا بقى بالذوق

بدل ما جوزك يطردنى

اروى : يطردك ايه هو يقدر

لا خليكى شويه

علا برخامة:بذمتك اخلينى

انتى عارفه انى ندله واعملها

وساعتها اقل حاجة هنترمى انا وانتى من الشباك

او اترمى انا بس

ما انتى مش هتهونى عليه طبعا

اروى : ههههههههه خليكى شويه يا بايخة

علا : لا ياستى بما انى بايخة فانا هاقوم بكرامتى

ده انتى حتى ماعزمتيش عليا اشوف صور الفرح

اروى : اصلا ما فيش صور فرح

علا : ياسلاااام عايزة تفهمينى ان حماتك ماطلعتش عينكم وصممت تطلع معاكم  فى كل صورة

اروى : لا .. ياستى حماتى ماطلعتش فى اى صورة
الصور لنا ولاصحابنا بس

علا: أمال يابنتى فين اهل العريس

هما كانوا معتزلين الفرح ولا كان وراهم فرح تانى

اروى فى حرج: ههههههههه

لا بس محدش من عيلته يعرف اننا اتجوزنا

علا : نعمممم

****************************







الجمعة، 3 ديسمبر، 2010

الحلقه السابعة : انا بيتهيالى ..ولا ده حقيقة ؟؟؟؟؟؟؟؟؟؟؟؟؟


الحلقة السابعه




لازم أقرب وأتاكد

مش ممكن يكون الشبه للدرجه ده

علا لنفسها

( شبه مين يابنتى ما تكبريش الموضوع انتى اصلا ما شفتهيوش الا فى الصور )

خلاص حكمتى ان الشخص ده هو

ثم وجهت حوارها لسارة : معلش يا سارة خليكى هنا ثوانى وراجعه لك

سارة: انتى هتثيبنى وتروحى فين وانا رجلى مكثورة

علا : مكسورة ايه بس

ثوانى وراجعه لك

ولم اترك لها فرصه لاضافة اى كلمة

وبسرعة قربت للمكان اللى اتهيالى انى لمحته فيه

بس للاسف مالقتش اى حد

رجعت لسارة وانا مخى بقى دوامة من التفكير

واخيرا اقنعت نفسى انى بيتهيالى

مش ممكن يكون رجع مصر وماحدش يعرف

منك لله ياسارة

هو اليوم كان باين من اوله

اما كل ده حصل وانتى لسه ما قراتيش فاتحة

ربنا يعديها على خير لحد ما تتجوزى

علا : هتقدرى تقومى معايا ياسارة ولااوقف تاكسى وارجع لك

سارة وكانى غلطت فيها : اقوم معاكى ازاى وانا مكثورة

وتاكثى ايه اللى عايزانى اركبه .

علا بنفاذ صبر : امال سياده الكونتيسه تحب نروح ازاى ؟ 

نعدى على المتحف نجيب لك عربيه تحتمس الثانى ونشوف لنا كام حصان يجرها





سارة : انتى بتتريقى ياعلا

علا: انا

لا.. ابدا

اخص عليكى ما تفهمنيش صح يا ثارة

نظرت لى سارة شذرا وانا انطق اسمها بنفس لدغتها

و كل اللى قلته الاول ولا خدت بالها منه

ثم اردفت فى خيلاء : لا انا اتصلت على زوما وهو هيجى ياخدنى

ابقى تعالى معانا ممكن نوصلك

علا : مين ؟؟

زوما .

ده توك توك نوع جديد

سارة فى انزعاج واضح: علا

توك توك . ايه بس .

علا : معلش ممكن توضحى لى انتى عارفه ان فهمى على قدى

(وقعدت اراجع اسماء قرايب سارة اسم.. اسم

اللى اعرفه واللى سمعت عن وجوده

المشكله ان الاسم مش غريب

ممكن اكون سمعته فى اعلان لبان

صورايخ اطفال

اه فى لعبه اسمها كده

وهززت راسى فى نفى : لا....لاده كان اسمها ...

لا هى اللعبه اللى فيها الكور

هو الاسم مش غريب عليا

فقررت انى اريح نفسى

وبسرعه طبعت الابتسامة البلاستيك

على شفايفى وقلت لها:

معلش ياسارة قلت لى: ل مين اللى جاى ياخدك ؟؟

سارة : اووووه ما تركزى شويه.. قلت لك زوما

وممكن اخليه ياخدك معانا

علا : ربنا وحده اللى بياخد

احممم احممم

اقصد وعلى ايه انا اعرف اروح وحدى

وسكتنا

وصممت انى مش هاسال تانى

انا هاعرف لوحدى

وقلت يمكن تكون خدمة جديده زى خدمة تاكسى العاصمة

اه

ممكن ليه لا

وبعد ساعه ونصف

هبت حتة عاصفة ترابيه


انما ايه

بس الغريب ان العاصفه الترابيه مليانة دخان عوادم

كح كححكحكحكحكح

ايه انتى فين ياعلا ؟

انا هنا ياسارة

كحكحكحكح

ايه ده ؟

وشويه والرؤيه بدات توضح

وسمعت صوت بيقول سلام عليكم

ولقيت سارة بقدرة قادرة

صوتها انخفض بزوايه 180 درجه

وكأن حد عمل لها

Mute

وبما ان سحب الدخان والتراب بدات تهدا والرؤيه وضحت نسبيا من حوالينا

فقلت ارد السلام

ما هو رد السلام واجب

لسه هرد

لقيت سارة بتقول : اعرفكم

علا جارتى

البشمهندث زوما خطيبى

مهندث ميكانيكا قد الدنيا

بصيت قدامى ما شفتش اى حاجة

ولو انى مميزة ببدله اقصد بنطلون بدلة

رفعت عينى لفوق وصلت للقميص

رفعت عينى كمان

كمان

يااااااااااا

هو ده بدا خطيب سارة

لك حق يا بنتى انك تلبسى كعب

رفعت راسى وعليت صوتى علشان يوصل لفوق عنده

وعليكم السلاااااااااااااام ورحمة الله وبركاته

وطبعا بما انى مش عارفه اسمه ومايصحش انى انطق الاسم اللى بتدلعه به سارة

فاكتفيت برد السلام

وسكت

البشمهندس : خيى ياساية

ايه اللى حصل خضتينى

(علا لنفسها ما جمع الا لما وفق خير بقت خيي

الله عليكم ونعم الدويتو )

سارة بمنتهى التاثر : شفت يازوما

رجلى انكثرت

خطيبها قصدى اللى لسه هيكون خطيبها : الف سلامة عليكى

تحبى نيوح لدكتوى

سارة : لا

انا عايزة اروح البيت

البشمهندس : من عيونى

انتى بس تطلبى وانا عليا انفذ

علا : احممممم احممممممم

طيب استاذن انا بقى

البشمهندس : لا ازاى احنا لازم نوصلك

مش حضيتك جاية ساية

تنحت شوية بعدين فهمت انه يقصد انى اكون جارة سارة

علا : اه احنا جيران

بس مافيش داعى للازعاج

البشمهندس : ولا ازعاج ولا حاجة

سارة : ماتلحش عليها يازوما

ثيبها على راحتها علشان ما تتضايقش

علا لنفسها بقى كده

طيب والله لا اركب معاكم ومش هاسيبكم من غير محرم

سارة : شكرا لذوقك يا بشمهندس

وبما انى طريقنا واحد يبقى ما فيهاش ازعاج

ومسكت ايد سارة وانا بابتسم بكل استفزاز

هاتى ايدك ياسارة واسندى عليا

علشان تعرفى تركبى العربيه

البشمهندس : طيب هسخن العيبيه




وبمجرد ما بدا يدور العربيه عرفت انها عامل اساسى

فى زيادة مشكله التلوث فى مصر

وفهمت ايه سر العاصفة الترابيه اللى هبت فجاه بدون انذار

وركبت معاهم

وماحبيتش أرخم عليهم اكتر من كده

فقررت انى اتصل على اروى اشغل نفسى عنهم شويه

علشان ما احرجهمش

علا : سلام عليكم

أروى : ازيك يا علا

فينك يا بنتى

علا : فى الدنيا

يعنى هكون فين

انتى فى البيت اعدى عليكى شويه

اروى : بعد ساعتين هكون فى البيت

علا : اعترفى يا ندله خارجة ولوحدك ومن غير ما تقولى لى

ونخرج سوا

اروى بدلع : انا مش لوحدى

علا : اه الانا بقى هتشتغل

يا بنتى هو انتى تعرفى حد فى البلد ده غيرى

اروى : اه

انا خارجة مع جوزى حبيبى

علا : حمد لله على سلامته

هو رجع امتى ؟؟

اروى : من كام يوم

علا :وانا اقول اروى اختفت ومش بتسال

من لقى احبابه يا ستى

طيب يالا اسيبك معاه

اروى : هتعدى عليا امتى

علا : بذمتك انتى عايزانى اعدى اصلا

اروى : اه طبعا

هاستناكى

علا : لا خليها مرة تانيه

وفجاة افتكرت علا اللى لمحته من شويه

حاولت تتاكد منها من غير ماتثير شكوكها

علا : طبعا ما صدقتى جه علشان تاخديه وتتفرجى على الفيلم اللى هتموتى وتشوفيه

اروى : لا يا ستى ده احنا فى وسط البلد

بنشترى هدوم للبيبى

علا : وسط البلد

اروى : اه

علا فى زيادة تاكيد : رحتى المحل اللى شفناه انا وانتى الاسبوع اللى فات

سارة : لسه ما شيين من عنده من ربع ساعة

اشترينا كل الحاجات اللى فيه

هنا ايقنت علا انها لم تتوهم


وانها رأت اروى فعلا

لكن هل من راته مع اروى هو نفسه من تظنه انه هو

تابعوا معانااااااا