شجرة العائله

شجرة العائله

الثلاثاء، 14 ديسمبر، 2010

الحلقة الثامنة :لغز اروى :




ماما : ايه ياست علا كل ده تاخير؟

علا : الحمد لله اننا رجعنا اصلا

أصل ماشاء الله حظ ثارة عالى أوووووى

رجلها اتجزعت

والكعب اتكسر

وماجبناش اى حاجة

غير الالتهاب الرئوى اللى جالنا من المدخنة المتحركة الى ركبنا فيها
 

والدة علا: ليه بس ؟

علا : وده سؤال برضه مش باقول لك ده حظ ثارة

اقوم انام شويه لانى وعدت أروى اعدى عليها

والدة علا : هى كل يوم اروى

علا : يا ماما انا رحت لها اصلا

ولا انتم بتحسبوا مكالمات التليفون عليا

هى صاحبتك هترجع امريكا تانى امتى؟

علا : ليه بس ياست الكل هى مضايقكى فى حاجة

ووالدة علا : كل يوم خارجة من البيت وكمان بكرة رايحه عندها

والبيت ولا كانه فى بالك

علا : بس كده وانا ما اقدرش على زعل الجميل

ودقايق والبيت كله يبقى فى بالى

زى ما انتى عايزة

والدة علا : واعملى حسابك بكرة مافيش خروج

خالتك جاية تزورنا بكرة

علا : وايه المشكله ما خالتو بتزورنا على طول

هاجهز الغدا واسلم عليها

واروح اقعد مع اروى انتى عارفه انها لوحدها ومالهاش حد

والدة علا :يا بنتى هى مش معاها جوزها

علا : اه بس طول النهار فى شغله

والدة علا : عقبالك يارب كده لما افرح بيكى

علا : قلت لى خالتو هتيجى الساعة كام؟



والدة علا : طيب قولى امييييييييين

قولى ياااااااااااارب

اى حاجة

علا : ياااااااارب

ياااااااااااارب قوى ايماننا

والدة علا فى نفاذ صبر واضح وهى بتجز على اسنانها : اعملى
حسابك هنعمل اصناف كتير


علشان عايزة خالتك تشوف انك ست بيت ممتازة

علا : ماما يا حبيبتى ابعدى عن خالتو

ها ياحبيبتى

بلاش تجربى فيها اكلاتك الغريبه اللى انت بتعمليها
الست لسه مافرحتش بابنها

ووجهت اليها نظرة ذات مغزى ان شاء الله ربنا يفرحنا به قريب
علا: هى تفرح اه 
بس  
احنا مالناش دعوة
والدة علا فى تحفز: ليه يعنى ؟؟
هو هيلاقى احسن منك وبعدين خالتك لمحت لى كذا مرة

علا : يا ماما الله يهديكى

بلاش الكلام ده

والدة علا : بلاش الكلام ده ياماما!!؟؟؟

هتفضلى كده لحد امتى

الله يهديكى ياعلا

علا : اميييييين ياماما

*********************

وطبعا علشان اخلص نفسى من تلميحات ماما

كان لازم اظبط البيت واطير جرى على اروى حبيبتى

اللى صممت اننا لازم نتغدى سوا

علشان تورينى اخر اختراعاتها الطهوية


ترررررررن تررررررررررررن
 

أروى: معلش ياعلا ممكن تردى على الفون

علا : شغلونا عندكم بقى

ماكنتش عزومة غدا اللى هتشغلونا بيها

علاوهى ترفع سماعة التليفون

علا : سلام عليكم

خالد :وعليكم السلام ورحمة الله وبركاته

خالد وهو يعاود التاكد من النمرة التى اتصل عليها: مين معايا

علا فى لماضة واضحة: حضرتك االى متصل

حضرتك اللى تقول انت مين

خالد : مش .....مش ده منزل مدام أروى

علا : اه ثوانى اناديها لك

نقول لها مين برضه ؟؟

خالد : خالد

علا فى احراج : اهلا وسهلا حمدا لله على سلامتك يادكتور

خالد : الله يسلمك

ممكن اعرف بقى مين معايا

علا :انا زميلتها

ثانية واحده اناديها لك

وكان لازم اختم بالجملة التلقيديه : مصر نورت يا دكتور

خالد : منورة بأصحابها

ورحت اديت التليفون ل أروى

وانا محرجه جدا من العك اللى عكتيه

استاذنت اروى من علا لترد على زوجها

وبعد ان انهت المكالمة

اروى : معلش ياعلا اسفة سيبتك وحدك

علا : لا ياستى ولا يهمك

وبعدين يعنى بذمتك مين اللى يتساب انا ولازوجك

اروى : جوزى طبعا ده انا ما صدقت شفتك

علا : اه على يدى

والتجربه خير برهاااااان

اروى :هههههههههه لا مش خير برهان

انا بس مش متعودة منه يكلمنى فى الوقت ده لانه ميعاد شغله

بس هو لقى نفسه فاضى فحب يعدى عليا

علا : طيب استاذن انا بقى بالذوق

بدل ما جوزك يطردنى

اروى : يطردك ايه هو يقدر

لا خليكى شويه

علا برخامة:بذمتك اخلينى

انتى عارفه انى ندله واعملها

وساعتها اقل حاجة هنترمى انا وانتى من الشباك

او اترمى انا بس

ما انتى مش هتهونى عليه طبعا

اروى : ههههههههه خليكى شويه يا بايخة

علا : لا ياستى بما انى بايخة فانا هاقوم بكرامتى

ده انتى حتى ماعزمتيش عليا اشوف صور الفرح

اروى : اصلا ما فيش صور فرح

علا : ياسلاااام عايزة تفهمينى ان حماتك ماطلعتش عينكم وصممت تطلع معاكم  فى كل صورة

اروى : لا .. ياستى حماتى ماطلعتش فى اى صورة
الصور لنا ولاصحابنا بس

علا: أمال يابنتى فين اهل العريس

هما كانوا معتزلين الفرح ولا كان وراهم فرح تانى

اروى فى حرج: ههههههههه

لا بس محدش من عيلته يعرف اننا اتجوزنا

علا : نعمممم

****************************







هناك 8 تعليقات:

  1. هو كل مرة كده :((
    تخلص فجأة و مترضيش فضولي مش مهم انا وراكي للاخر :)
    المهم انا كالعادة اول تعليق
    متتاخريش بقي

    ردحذف
  2. بجد جميلة وتعبيراتها رائعة

    ربنا يوفقك و تحققى كل ما تتمنى

    و ان شاء الله تكمل و نشوفها فى رمضان القادم

    كل سنه وانتى طيبة

    ردحذف
  3. ممكن أستعير كلمة علا وأقولك

    نعععمممممممممم؟؟؟


    هو كل مره تعلقينا كده؟؟

    وبعدين الحلقه قصيره يا وايزى

    إحنا هنرجع للمقالب القديمه ولا إيه؟

    وربنا أعملك حزب معارض هنا كمان وأفضل وراكى لما تنزلى حلقه

    هو اييييه ... الله


    اعد تلاته الاقى حلقه على طوووول




    وااااحد

    ردحذف
  4. منى ابو السعود
    السلام عليكم ورحمة الله وبركاته
    انتى يا افندم اخر واحدة تتكلم عن التعليق
    انا مش ناسية الحلقه اللى سيادتك كتبتيها فى الليالى المصريه وعلقتينا كلنا
    منورة المدونة يامنى وسعيدة جدا بمتابعتك للقصه
    دمتى بكل خير

    ردحذف
  5. استاذ: محمد السيدالسلام عليكم ورحمة الله وبركاته
    اولا احب ارحب بك فى المدونة
    وان شاء الله ماتكونش الزيارة الاخيرة
    وسعيدة جدا برايك عن القصة
    وجزاك الله خيرا عن الدعاء
    دمت بخير

    ردحذف
  6. مها البنا السلام عليكم ورحمة الله وبركاته
    مش عارفه ليه الرد ده انا حاسه انى قرايته قبل كده
    هو انا كل ما اكتب قصه هاشوف الرد ده
    اقول لك انا بعد كده هاعمل خدمه الردود الجاهزة زى الرسايل الجاهزة اللى على الموبايل
    وانزل الحقله مع الرد يندد بقصر الحلقة
    وجنبه بالخط العرييييييييييض
    الناس اللى بقى لها اكتر من شهر ما بتكتبش حاجة خاااااالص
    ولا قصيرة ولا طويله
    ياترى يكون تعليقنا عليها ايه ؟؟؟؟؟؟؟؟؟؟؟
    اسيبك لك الرد يا افندم

    ردحذف
  7. السلام عليكم
    رائعة كالعادة
    ومنتظريين ابداعات وابداعات
    كما تعودنا ومن رقي الي رقي
    دومتي بكل الخير
    ووفقكي الله لما يحب ويرضي

    ردحذف
  8. وعليكم السلام ورحمة الله وبركاته استاذ مجدى
    اسعدنى مرورك ومتابعتك للقصة
    ورايك المشجع عنها
    واسال الله ان يوفقنى واياك وسائر المسلمين لما يحبه ويرضاه
    سؤال جانبى بقى معلش
    هو امتى هنشوف بوستات جديدة لحضرتك ؟
    دمت بكل خير

    ردحذف