شجرة العائله

شجرة العائله

الخميس، 18 نوفمبر 2010

الحلقة السادسة :تابع يوم مع ثارة

فضلنا نبص على المحلات


وفجأةوانا بكلم سارة حسيت ان الهوا جنبى حصل فيه خلل مش عارفه ليه؟؟


وسمعت دوشه وشفت حاجة من بعييييييييييييييييييييييييييييد


خير اللهم اجعله خير!!!!


ايه اللمعان ده؟؟


 !!!!!!!!!!تكون الارض بقت مُشعة


ااااااااااااااااااااالله


وابقى اول مصريه شافت اليورانيوم المشع فوق سطح الارض مش تحته

ايه ده استنوا كده

الوان الكتله المُشعة ده مش غريبه عليا

تكونش ده سارة ؟

بس ايه اللى مقعدها

اقصد اللى مكومها بعيد ؟؟

اما اقرب واروح اشوف

وعقبال ماعرفت اخترق الصفوف وربنا فتحها عليا

وقدرت اوسع لنفسى مكان علشان اشوف

وأتاكد من الكومة اللى على الارض

ولو ان اللمعان اللى انا شايفه مأكد لى انها سارة

بس برضه اقرب واشوف

وفضلت اجاهد واعبر بين الناس

لحد ماشوفت اللى شفته
*************
لقيت سارة موطية تبوس رجل الراجل اللى قدامها

لالالا مش للدرجه ده ياسارة

لو عايزة فلوس اسلفك عارفه انك داخلة على جواز

بس مش للدرجة ده

وقلت لازم اسحبها من على رجله

واقولها ما تعملش كده ابدا

ولسه باقرب وهاشدها وانا محضرة لها كلمتين

لقيت الراجل اللى هى اترمت على رجله بيقولها

معلش يا بنتى تعيشى وتاخدى غيرها

ماهو لازم تتقلبى بالكعب الاربعة دور اللى انتى لابساه

ساعدتها انها تقوم وقلت لها

علا : ايه اللى حصل ياسارة

سارة وهى خلاص على اخرها: الحقينى ياعلا وانا بعدى الشارع

كنت عديت والله

عديت والحمد لله

ولسه برفع رجلى علشان اطلع على الرصيف

مش عارفة اية اللى جرالى اتشنكلت الشنكلة اللى انتى شايفاها


برفع بعينى لقيت نفسى واقعة على رجل الراجل الواقف ده

علا : ده انا افتكرتك بتبوسى رجله

سارة : ده وقت هزارك

قعدت انفض فيها :ياخبر ايه اللى دلقك كده ياسارة

(حاولت امسك نفسى من الضحك)

بصعوبة

اقصد ايه اللى وقعك

سارة: شكلى اتحثدت ياعلا

الناث مش قادرة تنزل عينها من عليا

جابوا اجلى

علا : وهى عينهم تقدر تاثر فيك وانتى مزغللاها بالاضواء النايلون بتاعت البلوزة

سارة : قولى ماشاء الله

علا( والله اسيبك وامشى انا غلطانة) : ماشاء الله

وسندتها برفق : حاولى تقومى معايا

سارة: حاثبى بالراحة

علا : اللهم طولك ياروح

علا: تقدرى تمشى على رجلك

سارة : احاول
ولسه بتدوس على الارض
اكتشفت ان الهانم لابسه فردة واحدة بس وكعبها مكسور

طيب فين الفردة التانيه؟؟؟؟؟؟؟؟؟؟؟؟

سندتها لحد ما قعدتها بعيد شويه

ورحت ادور على حذاء الثندريلا ثارة

يارب عدى اليوم على خير

ومسكت الفاردة المكسور كعبها فى ايد

و فى الايد التانيه بازيح الناس اللى قاعدة تتابع الفيلم الصباحى اللى ببطولة ثارة وعلا

وفضلت ابص حواليا يمكن الاقيها

مافيش

ادقق تانى وابص كويس برضه مافيش
فايدة

وعلشان الناس ماتفهمش غلط وتقول انى اتجننت

قلت بصوت عالى نسبيا وبمنهتى الحرج : احمممم محدش لقى فاردة تايهة ياولاد الحلال
؟؟؟؟؟؟؟؟؟؟؟؟؟؟؟؟؟؟؟؟
الناس صراحه ماقصرتش

اللى يقول لى: ولما انتم مش قد الكعب بتلبسوه ليه

وواحد يقول :مش عاجبكم العجب ياستات وبتعترضواعلى خلقة ربنا

ماله القصر

حد يلبس كعب بالشكل ده اهو ربنا جزاكم

علا :لاحول ولا قوة الا بالله

انا باسال عن الفردة التانيه مش باطلب فتوى شرعيه فى لبس الكعب

المهم سمعت صوت مسرسع مخنوق كده بابص فى مستوى نظرى ماقدرتش احدد مصدره

رجعت ابص على الشوز لقيت الصوت أقرب وأوضح كمان

وحسيت بثقل فى الجيبه وكان الجاذبيه الارضيه سابت الناس كلها

وركزت مع جيبتى

ببص على مركز الجذب لقيت ايد صغنونة بتقول لى :




ياطانت ياطانت


علا: .........




حضرتك بتدورى على اخت اللى فى ايديكى ده

علا : ايوة ياحبيى ما لمحتهاش ينوبك فيا ثواب

الولد:اه يا طانت انا شفتها كانت بتطير
 لما طانت اختك كانت

وقعت على الارض

علا : طيب مالمحتش طارت فين

الولد: لا لمحت

ما انا كنت بالعب كرة انا وتامر صاحبى

وهو مسكها بايده لما طانت شاطتها من رجلها

علا : طيب ممكن تروح تجيبها من صاحبك يا حبيى

الولد:لا يا طانت ماهو تامر افتكر طانت مش عايزاها وزهقت منها وشاطتها

فلعبنا بها احنا كمان بدل الكرة اللى خدها عمو حسين علشان كسرنا إزاز المحل بتاعه

علا بنفاذ صبر: طيب حدفتوها فين اخر مرة

الولد : تامر شاط شوووووووووطة جميله كانت هتدخل فى الجوون على طول

بس

علا : بس ايه ياحبيبى انطق

الولد: العربيه صدتها فوقعت تحتها وداست عليها

لو حضرتك عايزاها تامر صاحبى رماها فى الصندوق الاسود الكبير اللى هناك

علا:.............


الصندوق ده

الولد: ايوة يا طانت ماما قالت لى ما ارميش حاجة فى الارض

لازم ارميها فى الباسكت

علا : فى الباسكت

وجريت على سارة وانا على اخرى طبعا

سارة : لقتيها ياعلا

علا : لا

سارة : اروح ازاى انا كده

علا : هناخد اى تاكسى لحد البيت

سارة : انا لثه ما خلصتش

علا : عندك حل تانى

سارة : اه اروح انا وانتى تكملى

علا( ده على اساس انى انا الفلبينيه بتاعت سعادتك ): لا يا حبيتى لازم تجيبى حاجتك بذوقك مش انتى العروسة

وطبعا الكلمة ده سكتتها

وبدات محاولات ايقاف تاكسى فى الصبا ح الباكر

علا : حاولى تسرعى شويه يا سارة الله يبارك لك

عقبال ما بنوصل للتاكسى للى وقف لنا بيكون زهق ومشى

وده رابع تاكسى نحاول نوقفه

سارة :يعنى اعمل ايه مش شايفه رجلى

اموت نفثى يعنى

علا فى نفسها( لا وده تيجى اطق انا واموت بغيظى



علا :حاضر ياسارة

على اقل من مهلك

وكأن سارة ماصدقت كلمه اقل من مهلك ده ومسكت فيها

وشدت الفرامل ولغت السرعة وبدأت تقلد السلاحف بالظبط

كان ناقص أغنى لها تاتة خطى العتبة

تاتة حبة حبة

وانا بادور وشى عن سارة بدل ما اتهور واسيبها فى الشارع واروح لوحدى

لمحت حاجة غريبه جدا

ايه ده ؟

مين اللى مع اروى ؟

انا عارفه الشاب ده

شكله مش غريب عليا

بس ازاى يكون فى القاهرة

المفروض انه فى امريكا ومش راجع دلوقت

وايه اللى موقفه مع اروى ؟



هناك 10 تعليقات:

  1. وبعدين معاكي انا كالعادة مبطلتش ضحك بس انا كان نفسي ثارة تقع في بلاعة دا المكان المناسب ليها
    واضح ان الموضوع هيكبر اروي و شاب مفروض يكون في امريكا اشم رائحة خيانة ....
    تسلم ايدك و في انتظار الحلقة الجاية
    و شكرا علي رأيك في كتاباتي و هاحاول اعمل اللي قلتي عليه و انتوا و نصيبكم معايا
    السلام عليكم

    ردحذف
  2. وعليكم السلام ورحمة الله وبركاته
    اهلا اهلا منى ابو السعود
    واول رد كمان
    شكلى هتعود على كده .. خدى بالك بقى
    اما ثارة فكان نفسى بصراحة اوقعها فى بلاعة زى ما قلتى بس اجلتها لحلقات قادمة ومناسبات اقرب
    وانتظرى تطورات ملحوظة وقويه فى الحلقات القادمة ان شاء الرحمن
    ومنتظرة اول قصة لكى واكون من اولى متابعيها
    وبلاش موضوع النصيب والحظ ده ما تعتمديش اووى
    انا هعتمد على ثقتى فى كتابتك
    منتظرة وما تتاخريش عليا
    دمتى بكل خير

    ردحذف
  3. ايه النور ده يا وايزى

    يا سلااااام .. مش عارفه ليخ فرحت فى (ثاره) ألا تفتكرى ليه؟

    مين اللى مع أروى؟ ومين أساسا أروى؟

    شكل الموضوع كبير يا فندم

    متابعه اما اشوف اخرتها (:

    ردحذف
  4. مستنية اشوف الاستاذة سارة هيحصلها ايه تانى
    بس ماتتأخريش ياوايز
    وياريت تبقى تنزلى هل لنا ان نعود تانى بجد كانت حلوة اوى

    ردحذف
  5. السلام عليكم
    بجد فيها ابداع وواقعية جميلة جدا
    ومنتظرين ابداعاتك ومزيد من الابداعات
    دومتي بخير

    ردحذف
  6. مها البنا السلام عليكم ورحمة الله وبركاته
    مش اللى منورة يامها
    المدونة هى اللى منورة بك
    ومش عارفة ليه كده حاسه انك شمتانة فى ثارة
    اكيد انا فاهمة غلط
    صح
    وبعدين ايه ده بقى ؟؟ انتى اللى بتسالى مين اروى ؟
    اقول بقى ولا اقول انظرى الحلقات السابقة
    يالا خليها عليا المرة ده
    أروى يا افندم صديقة علا الانتيم واللى كانت بتتكلم معاها عن العروسه الصينى افتكرتيها

    ردحذف
  7. Noha saleh
    السلام عليكم ورحمة الله وبركاته
    انتى عايزة يحصل لها ايه ؟؟
    أطلبى وانا عليا اعكس كل توقعاتكم
    يسلم لى مرورك يانهى
    وبخصوص موضوع هل لنا ان نعود ؟؟
    انا فعلا عايزة انزلها
    بس مش عارفه هى تنزل زى ما هى ولا هى محتاجة تعديلات
    لو عندك اقتراحات او اى نقد لها او حاجة حاسه انها ممكن تكون قصور فيها
    ياريت ما تحرمنيش من رايك الصريح فيها
    وان شاء الله اخلص بس القصه ده وابدا انزل هل لنا ا نعود المعدلة

    ردحذف
  8. الاستاذ:Magdy hatem
    وعليكم السلام ورحمة الله وبركاته
    ربنا يكرمك على رايك المشجع
    وفى انتظار بوستات حضرتك
    الجديدة ان شاء الله

    ردحذف
  9. ههههههههههههه
    دمك شربات ... سكر
    تعيشى وتاخدى غيرها يا ساره
    سرد الموقف جميل ودمه خفيف
    الى المزيد من المواقف
    تحياتى

    ردحذف
  10. mrmr السلام عليكم ورحمة الله وبركاته
    ربنا يكرمك يامرمر ده بس من ذوقك
    ولسه ساره هتاخد غيرها كتييييييييييييير
    وهتتعبنا معاها
    والى المزيد من المواقف قريبا ان شاء الله
    دمتى بخير

    ردحذف