شجرة العائله

شجرة العائله

السبت، 14 أغسطس 2010

الحلقة الرابعة :عروسة صينى ... لا وايه ديلفرى

الحلقة الثالثة



أنس:علااااااااااااااااااا



واستمر فى النداء حتى وصل الى غرفه الصالون



أنس: أيه ياعلا ناقص اجيب ميكرفون واناديكى علشان تسمعى



علا وهى تسد اذنيها بيديها : وانت محتاج



ما انت ربنا مبارك لك فى احبالك الصوتية



ماما : قولى ماشاء ماشاء الله

علا: ليه هو ده ينفع معاه حسد
ماما وطانت : اخص عليكى ياعلا
ماشاء الله عليه

ثم التفتت طانت زكية لانس: مافيش ازيك ياطانت



أنس باحراج : معلش ياطانت اسف ماخدتش بالى



حضرتك عامله ايه



طانت زكيه : ولايهمك يا حبيبى



انت اخبارك ايه ؟



أنس : الحمد لله



طانت زكيه : قريب جدا هاحتاج منك خدمة صغيرة كده



أنس : منى انا؟؟؟ وخدمة ؟؟



طانت زكية :  امال مين اللى هيعمل هيصة لسارة ويفرحها



أنس : حضرتك تؤمرى يا طانت فى اى وقت



طانت : عقبالك يا حبيبى



أنس بكل تاكيد: قريب جدا يا طانت ان شاء الله



ضحكت طانت وماما بشدة



طانت زكيه : ومتسربع على ايه؟؟



أنس  فى انكار: متسربع ايه بس ياطانت
ده جدو اتجوز اصغر منى



بعد اذنكم



تعالى ياعلا معايا عايزك ضرورى



علا : ربنا يستر



وخرجا من الغرفة



علا : خير يا سيدى



ماهو انت مش ممكن تصحى بدرى



لا و كمان تدورعليا مخصوص 
 اكيد يعنى مش علشان تصبح عليا
أنس : عايز جمعية ضرورى



ولازم اقبض الاول ويكون قبضها 1500 جنيه



امسكت علا بورقه من مكتبه وكتب : جمعية



الاول



1500



بسرعة



وبصت له بكل سخرية : لك طلبات تانيه نكتبها فى الاستمارة



أنس : علا انا مش بهرج انا بتكلم جد

علا : ولا انا


 
انا كتبت طلباتك وهستنى بابا نويل لما يجي ويديها لك




أنس : علا بطلى رخامة



انا فعلا محتاج الفلوس ده



مش نفسك تفرحى باخوكى قريب



علا : وايه علاقه ده بده؟



هما بيوزعوا بكالوريسات الهندسه دلوقت من سنه اولى



أنس : لا طبعا



بس انا هفرحك اووى وهعمل حاجة ماما نفسها فيها من زمان



علا  وهى تفكر بجدية :وهما 1500 يطلعوا  ماما عمرة 
 أنسى
العمرة اغلى من كده



وبعدين ما ينفعش تطلع ماما عمرة وتسيب بابا



أنس بحرج : لا طبعا



ان شاء الله لما اكبر واتعين هاطلعهم هما الاتنين عمرة سوا



انا هفرحهم بطريقة تانيه خالص



علا وهى تهرش راسها  : مش فاهمة



أنس : تعالى اوريكى



واشار انس لاحدى صفحات الفيس بووك



علا : هتورينى ايه على الفيس بووك



أنس : اقرى بس وانتى ساكتة


. بسبب ارتفاع تكاليف الزواج



قررت الصين مساهمة منها فى التيسير على الشباب



بتوفير فرص للزواج



نقدم لكم



.
.
.
.
.
.


فرصة لكل شباب التكلفه 1200



بالاضافة الى 300 مصاريف شحن


مزايا اخرى يمكنك الاختيار من اكثر من كاتلوج



علا : انت اللى كتبت النكتة ده



أنس : ده مش نكتة



علا : ؟؟؟؟



أنس : اولا من غير تريقة لو سمحتى



ثانيا : انتى مش نفسك تحضرى فرحى



مش ماما نفسها اتجوز




انا هعمل جمعيه واجيب لى عروسة من هناك





وبعدين مش محتاجة شقة هى هتسكن معانا هنا



علا بسخرية : يا ماشاء الله



واتخيلت الموضوع ده لو اتسرب للبنات



احتمال كبير يعملوا غزوة للصين وتحصل اول ابادة جماعيه فى الالفية التالتة



أنس : ياعلا فكرى بعقل ايه المشكله فى كده



علا : ومين قال انها مشكلة

وهزت راسها فى سخرية واضحة

ده مصيبة



قال وانا اكبر مشاكلى موجات الحر اللى هتهب علينا فى رمضان



اتارى كمان الموجات مش حر بس



ده موجات بنات كمااااااااااااان



يا الله الواحد هيلاقيها من الحر ولا بنات الصين دوول كمان



وفجأة سمعنا ماما بتنادى ياعلا



الحقى هاتى اخواتك من الحضانة



علا : حاضر ياماما



أنس : هتعملى لى الجمعيه بسرعه



علا : اه ان شاء الله لما ارجع نتكلم ونشوف عايز كام وامتى



بس ما تفتحش الموضوع ده مع ماما سيبيها عليا

ثم اردفت فى سرها: اه انا استحمل الصدمات ده لكن ماما حراام
كفايه عليها اللى شافته مننا

أنس : طول عمرى اقول ماحدش يفهمنى غيرعلا حبيبتى



علا لنفسها علا ... وحبيبتى



حاضر يا انس ماتخرجش بس علشان لما



نرجع نكمل كلامنا



أنس : حاولى ماتتاخريش



**************



وخرجت عديت على صاحبتى أروى لانى وعدتها



اننا نعمل شوبنج سوا وبعد السلامات والتحيات



وطبعا ما غابش عن نظرنا
 (ده اذا كان لسه شغال اصلا)



ان كل حاجة بقت صينى



موبايل صينى



سخان صينى



أروى: ياااااربى .. ايه الغزو ده
 كله صينى؟



علا وهى تضحك : ياريتها جت على الموبايلات وشويه الاجهزة بس



أروى : ؟؟؟



علا : ماسمعتيش بقى المنتج الجديد اللى نازل السوق



أروى : منتج ايه؟؟



علا : عروسة صينى



أروى فى تفهم : اه اللى بتمشى وتنور



علا فى سرها ماوصلتش لسه : اه ياحبيتى بتمشى لكن مش بتنور



عروسه بجد



أروى: عروسه ازاى يعنى



علا : زوجة



مدام



Wife



أروى : نعمممممممممممممم



علا يبقى وصلت : اه يا حبيبتى



لا وايه عاملين عليهم ديسكونت محترم



أروى..............؟ 



علا : ايه يابنتى تنحتى ليه كده



أروى : مش عارفه استوعب



علا :  خدى ده كمان علشان تستوعيبهم سوا 
الخدمات بقى ممتازة موفرين للعرسان خدمة الديلفرى



أروى : ال ..ايه



علا ببساطة :الديلفرى



ثم اكملت بالفصحى : أى التوصيل للمنازل



كمان هنعلمكم انجليزى



ولا صينى علشان تتفاهموا مع العرايس الجداد



أروى : بطلى هزار رخم



علا هههههه: ياريته كان هزار يا بنتى



ياريته كان هزار



وسرحت وهى بتقول



تخيلى بقى لو واحد مش مرتاح مع مراته



او ياحراااااام مع المهور بتاعة الايام ده
  الواحد  دلوقت ماعندوش اى مشكلة
يعنى ب1500يعف نفسه بكام عروسه صينى



فى ثوانى يتصل باقرب سفارة صينى



وتجيب له احلى عروسة



او ممكن يروح يستلمها ويوفر مصاريف الديلفرى



وواضح ان الموضوع ضايق اروى جدا



لانها قالت بطريقة دفاعية : ماكلنا عارفين ان المنتجات الصين مغشوشة كلها



علا :طيب انتى نفدتى ومتجوزة



يعملوا ايه بقى الغلابه اللى لسه



أروى : نفدت ايه؟



افرضى حب يغير ويجرب الصينى



علا : ههههههههه



أروى : يارب هما المصريين ناقصين مصايب



تخيلى لو حد سمع الكلام ده



علا : بسيطه هتلاقى نصهم اتشل



والنص التانى بيفكر جديا فى الشلل



أروى : يا خوووووووفى



علا : والله عندك حق



الصينيات دلوقتى اقتحموا بيوتنا وحبه حبه نلاقيهم نازلين من حنفية البيت



أروى : ربنا يستر



علا: تعرفى كان نفسى اسال أنس هو العرض مستمر لامتى؟



أروى : ليه هما عاملين العرض عرايس وعرسان



علا : هههههههه



لا عرايس بس للاسف



أروى : امال بتسالى ليه ؟



علا : عايزة اعرف هو العرض عروسة بس



ولا عليها هديه اتارى او كمبيوتر



ومعاها مترجم ولا ده على العريس

ويمكن يبقى حظنا حلو

ونلاقى شركات عاملة عروض حلوة

واحنا بقى نقعد نختار
وندور على المواصفات القياسية
واعمل نفسى  ام العريف وانصحه

واقول له لازم ننقى حاجة يكون لها مركز صيانه قريب وكمان قطع غيرها متوفرة

مش برضه هتبقى مرات اخويا
أروى : انتى واخدة الموضوع هزار



علا : ومااخدوش هزار ليه



اللى هيفكر فى كده هيكون واحد بيهرج



لان سيدنا النبى عليه الصلاة والسلام



قال تخيروا لنطفكم
اروى: عليه الصلاة والسلام

اجى انا واتجوز بالطريقه ده



أروى  بنفس الحماس: على فكرة بقى الصينى ده مش عملى يعنى لو يقع يتكسر



علا : ااااااااه لكن العروسة المصرى تخبطيها فى الحيط ترجع تانى



ولو طلعت مغشوشه عنده قطع غيارها



اه طبعا مش مشترى من الموزع الرئيسى

هههههههههههههه

وبعد عدة محاورات تخللتها العديد من الدراسات



لمحاولة صد الغزو الصينى وايجاد سلاح رادع



بدون اى فايدة طبعا



استاذنت منها علشان اروح اجيب اثير واسلام



ورجعت بهم على البيت



وهى بتستعد لمحاوله صد الغزو الصينى على بيتهم



ياترى هتعمل ايه مع انس ؟



وهل ممكن انها تقدر فى صد هذا العدوان وحماية الاسر المصرية



هنشووووووف



هناك 22 تعليقًا:

  1. عروسه صينى؟

    يا نهار أبيض

    ده كلااااام؟

    وكمان دليفرى؟؟

    الحلقه دى أصابتنى بالإحباط

    كملى يا وايزى كملى

    لما نشوف أخرتها



    على جنب كده


    حلوه الحلقه .. عجبتنى رغم الصدمه (:

    ردحذف
  2. سلام عليكم ورحمة الله وبركاته مها البنا
    منورة المدونة
    ومستعجله على الاحباط ليه بس
    استنى لما تعرفى ان الموضوع ده كان منتشر الفيس بووك بجد
    تخيلى
    ربنا يعافينا ويمتعنا بعقلنا وبصيرتنا ما احيانا

    واسعدنى رايك عن الحلقه
    كفاكى الله شر الصدمة

    ردحذف
  3. الصين قادمه
    صحيح ماسالتيش لو بيعملوا خصم على الجمله هههههههه

    ردحذف
  4. استاذ :عمرو يسرى السلام عليكم ورحمة الله وبركاته
    الصين مش لسه قادمة
    ده جت من زمااااان وسكنت واستوطنت
    وبالنسبه لموضوع الخصم على الجملة
    هو اقتراح كويس من حضرتك ويشجع الصناعه الصينيه على الازدهار (قال يعنى هى محتاجة )
    شكرا لمرورك ودمت بخير

    ردحذف
  5. انتى قولتى ايه؟
    عروسة صينى؟؟
    ازاى يعنى
    بصى ياوايز انا هحاول قدر الامكان اخلى جوزى مايشوفش البوست ده
    قال صينى قال

    ردحذف
  6. Noha Salah السلام عليكم وحمة الله وبركاته
    كل عام وانتى اقرب الى الله وربنا يكتبنا جميعا من عتقائه اللهم اميييييييين وسلامى لجنى

    ردحذف
  7. Noha Salah السلام عليكم وحمة الله وبركاته
    اهلا اهلا يا نهى شفتى الى احنا فيه
    ااااااااااااه يا بنتى عروسه صينى
    وبالنسبه للبوست انا بافكر جديا اعمله hidden بالنسبه للرجال
    اه مش ماهو اذا بليتم فاستتروا
    ربنا لاتحملنا مالاطاقه لنا به
    نورتى المدونة يانهى دمتى بكل خير

    ردحذف
  8. رمضان كريم

    وكل عام وانتم بخير :)

    ردحذف
  9. عروسة صيني ؟؟؟؟؟
    سمعت عنها مؤخرا وطبعا استغربت
    وطبعا عارفين ان الصينية من غير دين يعني مش اهل كتاب
    لكن كمان عرفت انها ممكن تسلم وهي تقبل جميع الشروط
    طبعا مشعارف اقول ايه لكن مستنكر جدا كل حاجة صيني كمان شوية هيبقي في كهرباء صيني ومياه صيني وكل شي صيني لحل المشاكل الكتير ناس بتعرف تسوق الحاجة ازي
    بس وصلت كمان للبني ادمين
    رحماك ربي
    دمتي بخير

    ردحذف
  10. طلب عاااااجل

    إلى الفقيره إلى الله حضرة الأجلّ المحترم وايز هااانم الحكيمه

    بعد التحيه والشكر أعلاه

    نعلمكم أننا مشتاقووون (أى والله مشتااااقوووون) إلى بوست جديد

    وعليه فقد تم توقيع الطلب من المدونين بحلقه جديده أو حلقتين وهنيالك يا فاعل الخير والثواب

    والسلام ختام

    إمضاء مها بنت البنا وكمل يابنى الإسم للجد العاااشر وإختم

    ردحذف
  11. السلام عليكم

    رغم الصدمة
    لكن الحلقة دمها خفيف وحلوة اوى

    بس هنشوف امتى ؟؟؟!

    ردحذف
  12. أنا برضه عاوزه أسأل نفس سؤال بنت الإسلام

    هنشووووووووووف إمتى؟؟؟

    وش متعصب وبينقر بصوابعه على المكتب

    ردحذف
  13. اقصوصة
    السلام عليكم ورحمة الله وبركاته
    اهلا بك على مدونتى واعتذر بشدة عن التاخير فى الرد
    نورتى المدونة

    ردحذف
  14. استاذ :مجدى حاتم السلام عليكم ورحمة الله
    عجبنى راى حضرتك اللى وضحته انه طبعا الصينية من غير دين يعني مش اهل كتاب
    وده طبعا يتنافى مع اى شخص ناوى يبنى بيت فيه طاعه ويكون اولاده حجة له يوم القيامه مش عليه
    كمان المشكله ان النظرة دلوقت نظرة قاصرة جدا
    اهى عروسه من غير تكاليف والسلام
    والاسباب كتيره جدامنها الاهالى اللى بيغالوا فى طلباتهم
    ومنها الشباب اللى بيغالى فى توقعاته واحلامه فى شريكه الحياه اللى عايزاها تكون هى كمان طبقا للموصفات العالميه لدماغه
    ومنها البنات اللى لاتقبل التنازل عن انها تكون فى نفس مستوى فرح او شقه جارتها او صديقتها
    جزاك الله خيرا على المرور واتاحه فرصه لى للنقاش
    واعتذر جدا عن التاخير

    ردحذف
  15. مها البنا

    السلام عليكم ورحمة الله وبركاته

    طلب عاااااجل
    ايه ده مذيعه فى قناة الجزيرة يامها
    خير ربنا يستر من طلباتك
    ههههههههههههههه
    ههههههههههههههههههههههههههههه
    هههههههههههههههههههههههه
    ايه ده كتبتيها ازاى ده
    بجد ضحكتينى جدا ربنا ما يحرمنى منك



    تحفة
    وعليه فقد تم توقيع الطلب من المدونين بحلقه جديده أو حلقتين وهنيالك يا فاعل الخير والثواب

    ده ضحكتنى جداااااااا

    معلش ياموووو انتى اكيد متفهمة سبب التاخير

    ردحذف
  16. بنت الاسلام
    وعليكم السلام ورحمة الله وبركاته
    اهلا بك على المدونة معانا
    وبمناسبة الصدمة هى فعلا صدمة
    ازاى تفكيرهم يوصلهم لكده هو فى جواز بالشكل ده
    ده كانها سلعة
    المشكله الاكبر فى اللى موافقين على الافكار ده وبيتبعوها
    ربنا يعافينا

    ردحذف
  17. مها البنا سلام عليكم ورحمة الله وبركاته
    قريب ان شاء الله يامها
    انت عارفه الدراسه وظروفها
    ادعى لى بس بالتيسير

    ردحذف
  18. وايز انتى فين وفين البوستات الجديدة
    كده برضه كل ده غياب

    ردحذف
  19. حد يقولها يا جماااااااعه


    انا عاوزه حلقاااااااااااااااااااااااااااااااه

    اوووووف

    ردحذف
  20. Noha saleh
    السلام عليكم ورحمة الله وبركاته
    جزاكى الله خيرا على سؤالك عنى
    انا الحمد لله موجودة
    بس المشكله الكبرى ان نتى هو اللى مش موجود
    اصلهم خير اللهم اجعله خير بيحسنو الخدمة
    بس واضح ان الخدمة معصلجة معاهم شوية

    ردحذف
  21. مها البنا
    السلام عليكم ورحمة الله وبركاته
    انتى عايزة حلقات
    وانا عايزة نت
    شوفى لنا حل الله يكرمك
    حل لمشكله النت فى مصر كلها مش ليا انا بس

    ردحذف