شجرة العائله

شجرة العائله

الاثنين، 21 فبراير، 2011

الحلقة العاشرة : يوم عائلى جدااا

   الحلقه العاشرة



وزى كل يوم نفس الروتين طبعا

صحيت ولبست هدومى
ولبست اسلا م واثير وخدتهم علشان نرتاح منهم شويه

فعلا اختراع الحضانات ده ممتاز

يااااااااااا لو يعملوا حضانة للكبار كنت حجزت لانس وعلى حسابى

نزلنا من البيت واحنا بنردد دعاء الخروج زى ما اتعودنا

وصممت اثير انها تقول بصوت عالى زى ما هى متعودة فى الحضانة

أثير:بسم الله

وتسكت علشان نقول

وترجع تكمل بمنتهى الحماس

أثير:توكلت على الله

وتسكت وتبص لنا فى تحذير اننا نكمل بنفس الصوت العالى

وترجع تقول :ولا حول ولا قوة الا بالله

أثير:يالا قولوا بصوت عالى

(عقل اطفال طبعا بس المشكلة انى ما كنتش اعقل منهم )

وبعد ما ودتهم الحضانة

ولسه هاتنفس بارتياح

لقيت مكالمة من ماما حبيبتى بلعت ريقى وانا باقول فى سرى: استر يارب

وطبعا كانت المكالمة عبارة عن قايمة بطلبات تكفى مصر كلها

ومطلوب منى انا اشيلها بيدى المسكينة ده

واجيبها وانا راجعة

انا نفسى افهم هما ناسيين انا عندهم ولد اسمه أنس

امتى بقى الواحد يلاقى شغل
 بدل ما هومن البيت للسوبر ماركت لحضانة اسلام واثير والعكس

رجعت بكل الطلبات وانا حاسه انى ما اقلش عن اى بطل حمل اثقال

فتحت ماما الباب واخدت منى الطلبات



وهى بتسالنى جبتى كل اللى قلت لك عليه ؟

علا وهى بتلهث :اه

والدة علا : اوعى تكونى نسيتى العيش؟

علا : لا

والدة علا : والبهارات اللى طلبتها

علا وهى بتشرب اقرب كوبايه مايه لها : كل اللى طلبتيه جبته

وكعادة كل الامهات ما صدقتش الا لما قامت بجولة استكشافية تاكيدية على الطلبات

قعدت اتابع ماما بعينى
وهى بتفتح كيس كيس علشان تطمن

وبعدين قالت لى : كويس ما نسيتيش حاجة المرة ده

علا :......................

انا هاتوضا واصلى الضحى

واتفرج على التلفزيون تحبى اساعدك فى حاجة؟

تررررررن ...تررررررررررررن

والدة علا:ردى على التليفون ياعلا ايدى مش فاضية

ترررررن .. تررررررررررن

علا وهى بترفع السماعة :سلام عليكم ورحمة الله وبركاته

الطرف التانى :اهلا اهلا بعروستنا الحلوة

علا هى فيها عروستنا :اهلا يا خالتو...ازيك عاملة ايه ؟

خالة علا :اهلا يا حبيبتى وحشانى

علا : وانتى اكترياخالتو

انتى عاملة ايه؟

خالة علا : كويسة
باقول لك ايه ياعلا؟

علا : نعم

خالةعلا :فاضية امتى؟ علشان عايزين نخرج كلنا سوا

من فترة  كبيرةما اتجمعناش

علا لنفسها انتى مش لسه كنتى معزومة عندنا انتى وابنك :...........

خالة علا :ها يا حبيبتى تحبى نروح فين ؟

وامتى ؟

علا : والله ياخالتو اصلى مش فاضية

خالة علا :ليه يا حبيبتى مش خلصتى الجامعة

وعلى حد علمى مش بتشتغلى صح؟

علا وهى بتفكر فى مخرج :اااه صح

بس

خالة علا :بس... ايه؟

علا : حضرتك عارفه سارة جارتنا
فرحها قرب وهى مش عندها اخوات بنات

فانتى عارفه بقى بنت اختك تحب تساعد

خالة علا : يا حبيتى عقبال ما تعملى لك

وانا حاسة انه قريب اوووووووووى ان شاء الله

علا فى حرج :احمم احمم ثوانى انادى لك ماما

خالة علا : يا اختى شوفى البنت بتكسف من خالتها

وناولت علا التليفون لمامتها

وقالت لها ان خالتها على التليفون

وخرجت تتابع التلفزيون

وشوية وسمعت اذان الظهر

فخرجت صليت
 وقريت صفحتين من المصحف زى ما أنا متعودة بعد كل صلاة

وسمعت صوت ماما : خلصتى يا حبيبتى؟

علا : الحمد لله

والدة علا : ربنا يتقبل منك يابنتى

عقبال يارب ما تصلى فى بيت جوزك

وبدأت الاسطوانة اياها

وكأن الصلاة فى بيت الزوج بمثابه الحج فى الاجر مثلا

ومن ساعة التخرج وسلسله الدعوات اللى اخرها جوزك ده
بدأ بثها يومى

عقبال ماتاكلى مع جوزك



نفسى اشوفك فى بيت جوزك

وكأن وجودى الادمى مش هيكتمل الا لما اشوف المدعو جوزى ده
هزيت راسى لامى علشان اوقف سيل الدعوات
وقلت : ها ياحبيتى تحبوا تاكلوا ايه النهاردة؟

والدة علا: مش تقولى اميييين الاول؟

علا : قلت فى سرى

ها ياامى ياحبيتى تحبوا تاكلوا ايه قبل ما ارجع فى كلامى؟

والدة علا : اللى يريحك يا بنتى ..

جريت بسرعه من قدامها وانا بقول : اكلكم على مزاجى النهاردة

وفى سرى قلت جبتوه لنفسكم

انشغلت فى التجهيز بنفس درجة انشغال انس فى النوم

بعد الاجهاد المضنى لاحباله الصوتيه

قد ايه أنس اخويا بيتعب

يااااااااااااارب الجامعه تبدا بقى

والدة علا : يالا ياعلا هتتاخرى على اخواتك

علا : يا ماما انا مشغولة

صحى البيه اللى نايم ده علشان يروح يجيبهم

والدةعلا : لا انا مش هطمن عليهم غير معاكى

ما انتى عارفه انس ولا هياخد باله منهم

علابنفاذ صبروببرود مصطنع: ياامى معلش نعلمه

والدةعلا :نعلمه فى اخواتك؟

علا : هما مش اخواته برضه؟

والدة علا: اه بس انتى البنت مسيرك تبقى ام

عقبال يارب اما اشوفك فى بيتك ومعاكى ولادك وجوزك

وكان ده بمثابه انذار ليا علشان اجرى واخدهم من الحضانة

قبل تلقى المزيد من الدعوات الموجهة بطيئه المفعول

وصلت الحضانة وكانوا لسه مخلصوش فاضطريت انا اقعد ساعه علشان يخلصوا

بدل ما ارجع البيت وانزل تانى

وبعد ساعة ونصف كنت راجعه وفى ايدى اثيرواسلام

اللى مبطلوش كلام من ساعة ما اخدتهم من الحضانة

ورجعنا ولقيت بابا حبيبى مستنينا

علا واسلام واثير : سلام عليكم

الوالد : وعليكم السلام ورحمة الله وبركاته

ايه اللى اخركم كده ياحبيتى

علا : الاساتذة ماخلصوش حفظ
فاضطريت استنى لحد ما يحفظوا

وعلا وهى بتدور على انس

علا : بابا أنس فين ؟

والد علا :شكله دخل ينام حبة

علا فى تهكم : والله اخويا ده بيتعب

ثم نادت على اسلام واثير : مش وعدتكم لو حفظتوا لكم مفاجاة

طالعتها اعينهم البريئه باستفسار

علا: انا نزلت لكم اللعبه اللى كنتم عايزينها على الكمبيوتر

اسلام واثير : هيه هيه هيه

فاكملت علا فى دهاء: بس للاسف مش ينفع تلعبوها دلوقت معلش

علشان انس نايم زى ما انتم عارفين

الا بقى لما يصحى

لو صحى ممكن تلعبوا براحتكم

يالا يا حلووين روحوا اقعدوا
واستنوا لما اخوكم الكبير يصحى
علشان تلعبوا
وابتسمت فى شر

وهى متاكدة انها باسلوب غير مباشر اديتهم الاذن لايقاظ انس باى وسيله

وسابتهم علشان يقدورا يزعجوا انس براحتهم

علا لنفسها : مش بيقولوا الاطفال احباب الله ربنا ما يحرمنى منكم يا اخواتى ياحلووين

ورجعت علشان تشوف باباها

علا:هى فين الحاجة ؟
سايبه نصها التانى قاعد لوحده ليه؟

وحطت ايدها على كتفه وقالت : اوعى تكون مزعلها ياحاج

قولى بس ياحاج قبل ما المواضيع تكبر وتخرج من ايدينا

والد علا:ههههههههههههه

والدعلا : كده برضه تستخسرى فى والدك حبة راحة

علا : لا ..لا ..احنا فينا من كده برضه فينك ياماما تيجى تسمعى

والد علا:يابنتى ده اللى واخد مؤبد بيخرج بربع المدة لو حسن السير والسلوك

مستكترةعلى باباكى حبيبك ساعة إفراج

علا :هههههههه لا يُمكن
احنا الجواز عندنا سجن
لا بينفع فيه حسن سير وسلوك ولا سوء سير وسلوك

واهو كله تكفير للذنوب يا والدى

والد علا وعلا :هههههههههههههههه

ولمحت علا أنس وهوخارج من اوضته
 أنس اللى بيفرك عينه ويحك رأسه بيديه
أنس: والله حرام الواحد مايعرفش ينام فى البيت ده

علا ببراءة : ايه يا بنى ايه اللى صاحك ؟

ده حتى المغرب لسه ما اذنش ؟

أنس : اخواتك الرخميين قال ايه !!!
قووم علشان عايزين نلعب

علا : مع انى منبهه عليهم

أنس وهو لسه نايم مش فايق: هو احنا مش هناكل بقى؟

علا : هناكل طبعا بس مستنين ماما لما ترجع

والد علا: والدتك طلعت عند جارتها ومش هتتاخر

وقالت عقبال ما تشوفها عايزة ايه تكونوا رجعتم بالسلامة

علا فى سرها ربنا يستر

أنس: طيب قومى جهزى لنا الاكل عقبال ماما تنزل

والد علا: يا بنى قوم اغسل وشك وصلى الاول

أنس : يعنى هو احنا لازم نستنى ماما

علا : لا ....... ابدا

طول عمرى أقول أصيل يا انس

أنس : قصدك ايه؟

علا : فيه خيارات ؟؟؟

أنس : لا

علا:يبقى انت عارف

وجريت على المطبخ وهى بتقوله : الحق اجهز الغدا علشان اخويا حبيبى جعان

ونادت على اثير واسلام علشان يساعدوها فى اعداد المائدة

علا : اسلام ..اثير
تعالوا عايزاكم

علا : اسلاااااام..... اثيييييييييييير

علا : اسلام اثير تعالوا حطوا الاكل على السفرة

وطبعا اسلام واثير ولا معبرينى

اكيد هو فى حد يسيب الكمبيوتر ويساعد اخته

بقى ده كلام

ولزوم التطنيش رفعوا صوت الجيم جامد علشان يغطى على صوت علا مش باقول لكم: اجيال صاعدة

أنس : اى مساعدة؟ حد عاوازنى ؟

علا : لا..... مش ممكن أنس بيه تنازل وشرف مطبخنا المتواضع

انس: يالا الواحد لازم من وقت للتانى يتفقد احوال رعاياه

هاتى بقى ادخل لك الاطباق على السفرة

فهمت علا قصده طبعا : تسلمى لى والله

ياريت لو تدخل العيش
وانا هاجيب الباقى واحصلك

انس : لا هاتى اشيل عنك الحاجات السخنة

ثم اكمل متصنعا البراءه: علشان ايديك

علا بخبث : يسلمى لى الحنين والله

بس انا لو اديتك تشيل السخن عقبال ما اجيب العيش

مش هيكون سخن يا حبيبى

هيكون برد جوه بطنك

انس: ومستخسراها فى اخوكى

هى بطن حد غريب؟

وبعدين ماهو الاكل ده اصلا معمول لنا

مش للجيران يعنى

علا : اديك قلت لنا مش لك وحدك؟

انس بعد ما احبطت علا كل مساعيه : على الاقل هاتى العيش معاه حاجة

اقول لك هاتى ادخل لك سلطه الطحينة
بدل ماهى مركونة جنبك كده

علا وهى بتبعد ايده : والله ما انت تاعب نفسك ابدا

وبعدين انا فرحانة بركنتها جنبى

أنس: تصدقى انا غلطان انى فكرت اساعدك اصلا

علا : ما هو ياانس يا حبيبى لو مساعدة بريئة كنت فرحت

لكن بطنك اللى انا سامعه صوتها فى ودنى

تخلينى اعيد التفكير فى نيتك فى مساعدتى

أنس:على فكرة انتى بقيتى غريبه اووى أوووووف

علا: اووووف ايه ؟ هو انتى بتطفى شمعه

أنس : يا اخواتى على خفة الدم

انا مش عارف بابا وماما عملوا ليه كده فينا

وساب لها المطبخ وخرج

علا بابتسامة انتصار :الحمد لله ربنا يقدرنى دايما على فعل الخير

وطبعا كان لازم اسلام واثير ينوبهم من الغلاسة جانب

علا: انتم كله ده مش سامعين؟؟

علا وهى بتوطى صوت الجيم : طبعا لكم حق ما تسمعوش حاجة خالص


اسلام: كنا بنتفرج على صورنا لما كنا فى الرحلة

رفعت علا عينيها لترى ما يشير اليه اسلام: ممممم

اثير :شوفتى ياعلا صورنا واحنا جنب النسانيس

علا : شفتها بس المشكله انا مش عارفه انتم فين فى الصورة

وسمعت صوت والدتها

والدة علا : كل ده يا علا والكل مجهزش؟

علا : حمدا لله على السلامة ياست الكل

ثوانى والاكل على السفرة

وبدأت فى توضيب الاكل ورصه على السفرة




علا وهى متابعة أنس اللى بياكل بشهيه مفتوحة وكانه خايف ليكون الاكل تبع الاحلام ولسه ماصحيش

علا: ايه ياأنس حاسه ان الاكل مش عاجبك

انس: أمرى لله

ولولا انى صاحى من النوم مش مميز اوى ما كنتش اكلت حاجة صراحة

وأنا زي الحمل الوديع رحت قلت: معلش يا حبيى النوم باين انه سادد نفسك

ورحت بسرعه بعدت ايد اسلام واثير من جنبه ليفتكرهم تبع قايمه الغدا

استر يارب دوول اخواتنا برضه

انس :  ايه رايكم النهاردة نروح نلعب كرة سواااااااا

اسلام واثير: هيه هيه هيه هيه

احنا خلاص شبعنا

علا وهى بتفتكراخر مباراه لهم

تعالوا افتكروا معايا

اخر مرة شفتهم بيلعبوا فيها
كانت الادوار كالاتى

كان انس حارس مرمى طبعا

واسلام: قايم بدور مدافع أشول ورجله بسم الله ماشاء احسن رجل تحدف شمال

اما بقى اثير الحلوة فهى احسن واحدة فى الكون مش بتميز بين الكرة او اى حجر فى الشارع

كله بيشاط

عن اذنكم اقول للحاج والحاجة يبعدواعن طريقهم الساعه دى برضه كبروا وما يتحملوش

هزيت راسى فى اسى وانا باواسى نفسى :

الله على الفريق الكروى المنزلى

فينك يا ابو تريكة ؟؟
 ياريت ماتزعلش ياحضرى

ربنا يعوض عليكم وعلى مصر كلها

الحمد لله انهم ما بيحلموش بالاحتراف

بس تعرفوا ؟؟
ان اثير اختى بتصعب عليا أووى

البنت ياحرام بما انها جت بين ولدين
فطبعا كانت شايفه الدنيا عجل وعربيات وماتشات كورة

وهى ولا فاهمة فيها حاجة

ومرة كده قلت انا الاخت الكبيرة لازم يكون لى دور مع اثير

احنا برضه اخوات

قمت جبت لها عروسه غلطت انا؟

اه غلطت خدتها منى وهى مستنكرة اوووووووى

وقالت لى انا عايزة زى ما جبتى لاسلام مسكتها من ايديها وقلت لها وانا باحاول اكون هادية : يا حبيبتى انتى بنوتة وعسولة لكن اسلام وانس ولاد

فراحت ردت عليا بعصبية : ماليش دعوة انا عايزة زيهم

حاولت افهمها انها بنت مع شكى طبعا خاصة بشعرها اللى عمره ما شاف توكة

ولا عمرى فى حياتى نلتها وشفتها مسرحة كده زى البنات ابدا

(يارب اشوفها قبل ما اشتغل نفسى احس انى ليا اخت بنت)

المهم بعد مجادلة طوييييييييييييييييلة اخدت منى العروسه من غير نفس

علا : ما فيش شكرا يا اختى يا حبيبتى؟

بصت لى اثير من فوق لتحت وكانها بتقولى شكرا على ايه؟

وسا بتنى ومشيت

وفى اخر اليوم داخلة اخلص شغل المطبخ اللى هو من المهام الوظيفية الغير معلنة للبنات

وبابص بعينى كده لمحت ايه

ايييييييييييييييييييييييييييييه ؟؟؟؟؟؟؟؟؟؟؟؟؟؟؟؟؟؟؟

لمحت العروسة اللى انا جبتها لاثير اختى

بس فين؟؟؟

لا مش فى الارض وهى نسيتها لا ده مرميه فى الباسكت

لااااااااااااا
لاااااااااااااااااا

ضاع اخر امل ليا فى انى الاقى حليف نسائى ليا فى البيت ده

وبصوت عالى وبعصبيه قلت : اثير.... اثير

وجت اثير وهى بتتمطع : نعمم

علا : يا حبيتى العروسه بتاعتك لقتها واقعه
اكيد كنتى بتدورى عليها

ومش عارفه سيبتيها فين؟

اثير: لا أنا رمتها لانها مش عجبانى.

علا:.......................

شلتها من قفاها زى ما اكون ماسكه حرامى بالضبط وانا باضغط على سنانى: خدى يا حبيتى عروستك

اثير بصوت عالى: انا عايزة عربيه زى اسلام
وهى بتخبط فى الارض :انا مش عايزة عروسة
شويه وسابتنى ودخلت قعدت مع اسلام وراسهم فى راس بعض

وطبعا مش محتاجة انى اقول لكم ان اسلام واثير ميتجمعوش ويجى وراهم خييييير ابداااااااا

وبعد نص ساعة خرج لنا اسلام وبمنتهى البراءة : ياماما ....ياعلا

اثير بتعيط ومش راضيه تسكت

قمت بمنتهى الكسل اشوف الاخ اثير اقصد الاخت اثير وانا فرحانة اووى انى عشت وشفتها بتعيط

على الاقل فيها صفه من صفات البنات
المهم دخلت وشفت وشها

ولا فى اى دموع وماسكة العروسه وبتقول لى : وااااااااااااااااء

شفتى عروستى

علا : مالها ما انتى ما كنتيش طايقاها

اثير : الحبر كله وقع عليها

وفجاه عينى خرجت 4 سم لقدام وبصيت لقيت ان العروسه خدت دش حبر محترم

حبر اخضر واحمر وازرق واسود

ما بقتش عروسه خالص

علا بعصبية: ايه اللى عمل فيها كده؟

اسلام واثير بمنتهى البراءه : ما نعرفش احنا لاقيناها كده

اثير : اعمل ايه واااااااااااء عروستى اتبهدلت

والدة علا: روحى ارميها بسرعه وقومى اغسلى ايديك

اثير وهى بتبص لى : علا ؟؟؟ماما بتقول لى ارمى العروسه

ثم اكملت فى براءة مش لايقه عليها ابدا : ارميها

علا :...............

ماما : قومى ياعلا بسرعه خلى اختك تغير هدومها اللى اتبهدلت

وارمى العروسه ده

اثير : لا مش هارميها علشان ده هديه من علا لا احسن تزعل

ماما : يا حبيبتى ارميها ما بقاش ينفع يتلعب بها تانى

وان شاء الله علا بكرة تجيب لك واحدة احسن منها

ثم اكملت امى وهى توجه نظراتها لى : صح ياعلا

علا :.........

اثير : لا مادام هتجيب لى هديه بلاش عروسه علشان بتتبهدل منى

خليها تجيب لى عربيه زى اسلام

والدة علا : وانت نازله بكرة مع سارة ابقى هاتى لاختك اللى هى عايزاه

علا : مين قال انى نازله مع سارة ؟

والدة علا : ماهو ان شاء الله بكرة هتنزلوا سوا علشان تحجزوا الفستان لان فرحها بعد اسبوع

علا :....................
ثاااااااااااااااااااااااااااارة تانى
تفتكروا فرح سارة هيعدى على خير ولا ايه اللى هيحصل فيه











هناك 10 تعليقات:

  1. بجد جميلة و حلوة قوى

    و اسلوبك رائع

    يارب تفرحى بنشرها

    و تخرج للنور و التليفزيون

    ربنا يوفقك و يحقق لك كل ما تتمنى

    ردحذف
  2. استاذ: محمد السيد السلام عليكم ورحمة الله وبركاته
    جزاك الله خيرا على متابعتك وتشجيعك الدائم
    ومتشكرة جدا على دعائك
    اسال الله لك كل توفيق
    دمت بخير

    ردحذف
  3. حلوه موضوع العروسه ده يا وايز

    عجبنى قوى براءة الأطفال ههههههههه


    متابعه يا قمر .. بس متتأخريش

    ردحذف
  4. ماشاء الله
    أسلوب رائع ومشوق
    تقبلى تقديرى واحترامى
    بارك الله فيك وأعزك

    ردحذف
  5. مها البنا السلام عليكم ورحمة الله وبركاته
    بالله عليكى ده براءه اطفال
    ده شراسه اطفال
    غتاتة اطفال
    لكن اسلام واثير هما فى مكان والبراءه فى مكان تانى خالص
    نورتى المدونة وسعيدة بمتابعتك
    دمتى بخير

    ردحذف
  6. استاذ: محمد الجرايحى السلام عليكم ورحمة الله وبركاته
    ارحب بك على صفحات المدونة
    جزيت خيرا على رايك المشجع
    دمت بخير

    ردحذف
  7. الله عليكى يا قمر
    اسلوبك رائع ومميز
    الله يكون فى عون علا بتتعب قوووووى
    تحياتى

    ردحذف
  8. السلام عليكم ورحمة الله وبركاتهmrmr
    هى فعلا علا بتتعب بس بتاخد حقها وتطلعه عليهم
    يسلم لى مرورك
    ودمتى بخير

    ردحذف
  9. وحشانى جدا على فكرة انتى فييييين
    وبعدين فين الحلقة الجديدة محتاجين حاجة دمها خفيف تفك الجو اللى احنا فيه ده

    ردحذف
  10. سلام عليكم ورحمة الله وبركاته
    ازيك يانهى معلش انتى عارفه الدراسه بتشغل جامد
    وادى الحلقة الجديدةنزلت
    بس ماعتقدش ان هيكون دمها خفيف اتمنى انها تعجبك
    دمتى بكل خير

    ردحذف