شجرة العائله

شجرة العائله

الثلاثاء، 25 يناير، 2011

الحلقة التاسعة : بداية الازمة (مخططات على مستوى عالى جدا ) ماما وخالتو



وطبعا بمجرد وصول خالد

اضطرت علا انها تستاذن وتمشى

وقامت أروى بتوصيل علا للباب

ورجعت لخالد


خالد : وحشتينى جدا

أروى فى دلال: ياسلام لو كنت وحشتك كنت جيت امبارح

مش طنشتنى

خالد : ما انتى عارفة الظروف

انا خايف ماما تعرف حاجة

ومش عايز اقول لها وهى لسه تعبانة

اروى : خالد انا قلقانة لااحسن ترفض وجودى

خالد : ما اعتقدش

لانها نفسها يكون عندها حفيد

أروى وهى تفكر بعمق : يكون عندها حفيد اااه
ما اعترضناش
بس

مش فى يوم وليله تقول لها
انا متجوز ياماما من 3 سنين



ومراتى كمان فاضل لها شهرين وتولد


انا متاكده انها مش هتعدى الموضوع على خير

ثم شردت وقالت:تفتكر احنا غلطنا؟؟؟

خالد : احنا ما غلطناش احنا اتجوزنا على سنه الله ورسوله

أروى : عليه الصلاة والسلام
خالد : ششششش
 ولا بس ولا ما بسش

قومى حضرى لنا الغدا

انا ماصدقت أنى عرفت اجى علشان اشوفك


اروى : ربنا يخليك ليا ياخالد

خالد : ويخليكى ليا انا وابنى

اللى جعان هو وابوه ومامته مش سائلة فى اى حد منهم

**********************

نرجع لعلا الى طول الطريق مش قادرة تستوعب
ازاى

اروى تقبل على نفسها انها تتجوز بالطريقه ده؟

للدرجة ده الغربه بتغير

وطبعا البيه جوزها
ولا على باله ان مراته حامل وجاى له ابن
وما حدش من اهله يعرف
اه لو اشوفه او المحه

اااااااااااااه


 
يا ترى ممكن يكون أنس أخويا فى موقفه ده

لا استحالة

ده ماما كانت تروح فيها
لا قدر الله
واستمرت علا فى التفكير الى ان وصلت للمنزل

والدة علا : كل ده يا بنتى عند صاحبتك

مالسه بدرى يا هانم
علا :  احممم احمممم
ياماما ياحبيبتى بقى لى سنين ما شفتهاش

وبعدين اعتبريها ثارة

والدةعلا:طيب ياستى قومى بقى حضر لنا العشا

مارضيناش ناكل من غيرك

علا : ما رضيتوش تاكلوا من غيرى

ولا مستنينى احضر لكم العشا

عامة حااااااااااااضر

دقايق ويكون العشا جاهز

والدة علا : طيب يالا يا لمضه

تعالى معايا نجهز العشا وبالمرة نرتب علشان عزومة بكرة

قامت علا على المطبخ تجهزالوليمة

اللى مامتها ناويه تعملها لابن خالتها

علا : ايه ياامى كل ده اكل!!!!!!!!!!!!!!


والدة علا : قولى ماشاء الله

علا : ماشاء الله ياستى

بس ده كتيير

حررررررررررررام عليكم

حسوا بمشاعر اهل الصومال

هى خالتو مخلفه درفيل

والدة علا : علا لو تبطلى طوله لسانك ده

علا فى براءة: هو انا غلطت؟

ده انتى عامله عزومة تكفى شارع بحاله

يافرحتك يا أنس
 

هو الوحيد المستفيد من الوليمه ده


أثير : علا تليفون علشانك

علا : مين يا اثير

علا : طانت الوى

علا : الوى

ههههههههه طيب هاتى

والدة علا فى تحذير : ما ترغيش كتير ما عندناش وقت

علا :طيب ياماما حااااااااضر

علا : يانعممم يااروتى

اروى : الناس تقول سلام عليكم الاول

علا : وعليكم السلام

يانعم يا اروتى

اروى:انتى مشغوله ولاايه

علا :لا يا ستى ولايهمك

بس طانتك ام علا عامله لنا عزومة وعازمة جيش بحاله

وطبعا مدبسة اختك الغلبانة فى المطبخ

اروى : الله يكون فى عونك

يعنى مش هتقدرى تعدى عليا بكرة

علا : لا اااااااصعب

انا مش عارفه هما يجيوا امتى ويمشوا امتى

اروى : طيب اسيبك علشان ما اعطلكيش

علا : استنى بس

هو الدكتور قلب عليكى ولا ايييييييييييه؟

اروى فى ثقة: لا طبعا هو يقدر

بس هو مضطر يرجع على والدته

وطبعا مش هيقدر يعدى على هنا

فقلت تيجى تقعدى معايا

علا : ده على اساس انى انا الاحتياطى

علا : لو قدرت وطفشتهم بسرعه ان شاء الله

هاجى لك اتفقنا؟

اروى : ياريت ياعلا

ان شاء الله سلام بقى وقتك خلص

اروى.سلام

********************

وفى اليوم التالى

خلصت علا شغل البيت بسرعه وخدت اسلام واثير للحضانة

وفكرت انها تتصل ب أروى لو فاضيه تطلع تقعد معاها شويه قبل العزومة

علا : سلام عليكم

أروى : وعليكم السلام ورحمة الله وبركاته

علا : ياااا خسارة شكلك فايق

ده انا قلت اغلس عليكى واصحيكى من النوم

اروى : لا يا ستى ضاعت عليكى المرة ده

انا صاحية من بدررررررررى

علا : انا نفسى افهم ايه اللى مصحيكى بدرى

طيب انا عندى اخوات بوديهم الحضانة

اروى وهى تضحك : وانا عندى طفل كبير

مصحينى من بدرى علشان اكل

علا فى حرج : هو زوجك عندك

أروى : اه يا ستى ومن بدرى جدا

علا : طيب هاكلمك وقت تانى

اروى : لا يا بنتى هو نازل خلاص

انتى جاية

علا : كنت

اروى : لالا علشان خاطرى هاقعد لوحدى طول اليوم

هاستناكى

علا : طيب وزوجك

اروى : يا بنتى نازل اهو

تعالى بقى

ما تبقيش رخمة

علا : طيب عايزة حاجة وانا جاية انا جنب البيت

اروى : عايزة سلامتك

يالا هاستناكى ما تتاخريش
تلكأت علا فى السير
لتضمن نزول خالد من المنزل

وبعد ان وصلت لمنزل اروى

اخذت تفكر اطلع دلوقت

ولا اتصل الاول اتاكد ان زوجها نزل

ولسه بتطلع الموبايل من شنطتها

انفتح

طاااااااااااااخ


انفتح باب الاسانسير فى وشها وطار الموبايل من ايدها

الشخص اللى فتح الاسانسير فى حرج وهويتناول هاتف علا من
على الارض




بعد ان تفكك : اسف جدا انتى حصل لك حاجة؟

علا : ما فيش داعى للاسف

انا اللى غلطانة انى واقفه فى وش الباب

الشخص بعد ان انتهى من تركيب اجزاء الموبايل التى تفككت

ثم قال وهو يمده لها :الحمد لله شغال واسف مرة تانيه

سلام عليكم

علا: وعليكم السلام ورحمة الله وبركاته

وطلعت على طول على شقه علا

وطبعا اخدهم الوقت فى الرغى وانتبهت علا

على تليفون والدتها

علا لنفسها : مش كان اتكسر وريحنا

علا : سلام عليكم ياماما

علا : يا ماما لسه بدرى دول هجيوا على 5

علا : يا امى اظبط ايه بس

ومن امتى وانا بروح كوافيرات

يا امى هى عزومة ولا حفلة

حاااااااااااااضر

هاجى حالا

لامش هاتاخروده تيجى

وبعد ان انهت المكالمة

اروى : طانت مضايقه طبعا لانك عندى وسايبه ضيوفك

علا :طول عمرك بتفهميها وهى طايرة

وبعدين يستاهلوا علشان تبطل هى وخالتو مخططاتهم ده

اروى : طيب ما تشوفيه هتخسرى ايه

علا ببساطة: هيتحرق دمى بس

واحد عايش بره طول عمره

تفتكرى ينفعنى

اروى : طيب ما انا جوزى عايش بره وماشاء الله عليه

قاطعتها علا : يا ستى ده حاجة وده حاجة تانيه

اروى : حكمتى ازاى؟

علا : بصى من الاخر

الشخص اللى فى زمانا ده ويسيب مامته تختار له واحدة ولا شافها ولا عرفها

اكيد باين اوى ان مالوش شخصيه

اروى : وليه تاخديها كده

يمكن بار بوالدته وواثق فى اختيارها

علا : يا سلاااااااااااام

وبعدين اقفلى بقى على السيره النكد ده

وبعد اربع مكالمات من والدة علا وخالتها تتعجلها فيها بالحضور

قررت علا ان تذهب للمنزل

وبعد ان وصلت علا للبيت

فتحت لها والدتها وهى تتوعدها قائلة : مابدرى يا هانم

ولسه علا هتدور على رد

لمحت خالتها

علا : خالتو حبيبتى وحشااااااااااااااانى خالص

خالة علا : يا بكاشة لو كنت فعلا وحشاكى كنت جيتى وقعدتى معايا

علا : معلش يا خالتو الوقت سرقنى خالص

وما اخدتش بالى

خالة علا : ولا يهمك يا عروسة

علا لنفسها : بدأنا بقى التلميح على عريس الغفلة

خالة علا : ده ابن خالتك قعد مستينكى كان نفسه يشوفك

علا بهمس: ما يشوفش وحش

خالة علا فى استفهام : بتقولى حاجة يا حبيبتى

علا : بقول خسارة ما شفتوش

خالة علا : ده نازل مضطر
لانهم اتصلوا به يستعجلوه فى المستشفى
 مع انه كان نفسه يسلم عليكى

علا : والله ماهو تاعب نفسه كانه سلم بالظبط

خالة علا : لا ازاى

ده لازم يجى ويسلم

مش عروسته وخطيبته
 علا : عرو...............................؟؟؟؟
عروسة اييييييييه وميييييييييييييين أنا
ياترى علا هتعمل ايه

وهتتصرف ازاى؟












هناك 8 تعليقات:

  1. بجد جميلة جدا

    و اسلوبك شيق فى الكتابة

    اتمنالك النجاح فى جميع كتاباتك

    و نشوفها صوت و صورة قريب

    و متنسيش حلاوتى

    ردحذف
  2. استاذ:mohamed elsayed
    السلام عليكم ورحمة الله وبركاته
    اعتذر بشدة عن التاخر فى الرد
    واشكر لك حسن متابعتك
    واسال الله لك المزيد من التوفيق
    دمت بكل خير

    ردحذف
  3. وايز

    أنا ومن موقعى الحالى .. أرفض بشده التعليق على تلك الحلقه الا عندما تكتبين حلقه جديده

    أنا عاوزه اعرف الست علا هتعمل ايه مع ابن خالتها وبما إن ليا سبق معاكى فى كتاباتك .. فأنا واثقه إنك أكيييييييد محضره كارثه وإن كنتى نسيتى اللى جرى .. هاتى (هل لنا أن نعود) تنقرى

    سلام يا ست وايز الحكيمه

    ردحذف
  4. اول مرة امر على مدونتك يا وايز
    لا دي حكاية جامدة جدا
    و اسلوبك ساخر و محترك و مميز
    تحياتي
    ساتابع
    موديل

    ردحذف
  5. السلام عليكم ورحمة الله وبركاته يامها
    وانا كمان من موقعى هذا
    اقول لك الصبر ان الله مع الصابرين
    استحملتى معايا سنتين القصه اللى فاتت
    اصبرى عليا القصه ده اصلا صغيرة
    وان شاء الله اخلص
    دمت بكل خير

    ردحذف
  6. موديل اهلا وسهلا بك معايا
    اسعدنى جدامرورك واتمى انها ما تكونش اول مرةواخر مرة
    اسعدنى جدا رايك

    ردحذف
  7. السلام عليكم يا فندم
    اعتذر عن تأخريييييييي الشديد بس فعلا ما كنتش بتابع حاجةو لا اشوف حاجة غير الاخبار ولحد دلوقتي مش قادرة اتابع حاجة تقريبا من التشبع اللي جالي من النشرات و التحليلات بس انت قصتك موضوع تاني انتي عارفة اني بستناها متتأخريش بقي في الحلقة الجاية

    ردحذف
  8. صديقتى العزيزة منى ابو السعود
    وعليكم السلام ورحمة الله وبركاته
    مافيش اى داعى للاعتذار لان ماكانش فى اى حد له نفس يتابع اى حاجة
    الحمد لله ربنا يقدر لمصر كل الخير ويرحم شهداءنا
    ان شاء الله هحاول انزل حلقه قريب
    وسعيدة جدا جدا بمتابعة مدونة جميله زيك وسعيدة برايك اللى اعتز به عن القصة

    ردحذف