شجرة العائله

شجرة العائله

الجمعة، 3 ديسمبر 2010

الحلقه السابعة : انا بيتهيالى ..ولا ده حقيقة ؟؟؟؟؟؟؟؟؟؟؟؟؟


الحلقة السابعه




لازم أقرب وأتاكد

مش ممكن يكون الشبه للدرجه ده

علا لنفسها

( شبه مين يابنتى ما تكبريش الموضوع انتى اصلا ما شفتهيوش الا فى الصور )

خلاص حكمتى ان الشخص ده هو

ثم وجهت حوارها لسارة : معلش يا سارة خليكى هنا ثوانى وراجعه لك

سارة: انتى هتثيبنى وتروحى فين وانا رجلى مكثورة

علا : مكسورة ايه بس

ثوانى وراجعه لك

ولم اترك لها فرصه لاضافة اى كلمة

وبسرعة قربت للمكان اللى اتهيالى انى لمحته فيه

بس للاسف مالقتش اى حد

رجعت لسارة وانا مخى بقى دوامة من التفكير

واخيرا اقنعت نفسى انى بيتهيالى

مش ممكن يكون رجع مصر وماحدش يعرف

منك لله ياسارة

هو اليوم كان باين من اوله

اما كل ده حصل وانتى لسه ما قراتيش فاتحة

ربنا يعديها على خير لحد ما تتجوزى

علا : هتقدرى تقومى معايا ياسارة ولااوقف تاكسى وارجع لك

سارة وكانى غلطت فيها : اقوم معاكى ازاى وانا مكثورة

وتاكثى ايه اللى عايزانى اركبه .

علا بنفاذ صبر : امال سياده الكونتيسه تحب نروح ازاى ؟ 

نعدى على المتحف نجيب لك عربيه تحتمس الثانى ونشوف لنا كام حصان يجرها





سارة : انتى بتتريقى ياعلا

علا: انا

لا.. ابدا

اخص عليكى ما تفهمنيش صح يا ثارة

نظرت لى سارة شذرا وانا انطق اسمها بنفس لدغتها

و كل اللى قلته الاول ولا خدت بالها منه

ثم اردفت فى خيلاء : لا انا اتصلت على زوما وهو هيجى ياخدنى

ابقى تعالى معانا ممكن نوصلك

علا : مين ؟؟

زوما .

ده توك توك نوع جديد

سارة فى انزعاج واضح: علا

توك توك . ايه بس .

علا : معلش ممكن توضحى لى انتى عارفه ان فهمى على قدى

(وقعدت اراجع اسماء قرايب سارة اسم.. اسم

اللى اعرفه واللى سمعت عن وجوده

المشكله ان الاسم مش غريب

ممكن اكون سمعته فى اعلان لبان

صورايخ اطفال

اه فى لعبه اسمها كده

وهززت راسى فى نفى : لا....لاده كان اسمها ...

لا هى اللعبه اللى فيها الكور

هو الاسم مش غريب عليا

فقررت انى اريح نفسى

وبسرعه طبعت الابتسامة البلاستيك

على شفايفى وقلت لها:

معلش ياسارة قلت لى: ل مين اللى جاى ياخدك ؟؟

سارة : اووووه ما تركزى شويه.. قلت لك زوما

وممكن اخليه ياخدك معانا

علا : ربنا وحده اللى بياخد

احممم احممم

اقصد وعلى ايه انا اعرف اروح وحدى

وسكتنا

وصممت انى مش هاسال تانى

انا هاعرف لوحدى

وقلت يمكن تكون خدمة جديده زى خدمة تاكسى العاصمة

اه

ممكن ليه لا

وبعد ساعه ونصف

هبت حتة عاصفة ترابيه


انما ايه

بس الغريب ان العاصفه الترابيه مليانة دخان عوادم

كح كححكحكحكحكح

ايه انتى فين ياعلا ؟

انا هنا ياسارة

كحكحكحكح

ايه ده ؟

وشويه والرؤيه بدات توضح

وسمعت صوت بيقول سلام عليكم

ولقيت سارة بقدرة قادرة

صوتها انخفض بزوايه 180 درجه

وكأن حد عمل لها

Mute

وبما ان سحب الدخان والتراب بدات تهدا والرؤيه وضحت نسبيا من حوالينا

فقلت ارد السلام

ما هو رد السلام واجب

لسه هرد

لقيت سارة بتقول : اعرفكم

علا جارتى

البشمهندث زوما خطيبى

مهندث ميكانيكا قد الدنيا

بصيت قدامى ما شفتش اى حاجة

ولو انى مميزة ببدله اقصد بنطلون بدلة

رفعت عينى لفوق وصلت للقميص

رفعت عينى كمان

كمان

يااااااااااا

هو ده بدا خطيب سارة

لك حق يا بنتى انك تلبسى كعب

رفعت راسى وعليت صوتى علشان يوصل لفوق عنده

وعليكم السلاااااااااااااام ورحمة الله وبركاته

وطبعا بما انى مش عارفه اسمه ومايصحش انى انطق الاسم اللى بتدلعه به سارة

فاكتفيت برد السلام

وسكت

البشمهندس : خيى ياساية

ايه اللى حصل خضتينى

(علا لنفسها ما جمع الا لما وفق خير بقت خيي

الله عليكم ونعم الدويتو )

سارة بمنتهى التاثر : شفت يازوما

رجلى انكثرت

خطيبها قصدى اللى لسه هيكون خطيبها : الف سلامة عليكى

تحبى نيوح لدكتوى

سارة : لا

انا عايزة اروح البيت

البشمهندس : من عيونى

انتى بس تطلبى وانا عليا انفذ

علا : احممممم احممممممم

طيب استاذن انا بقى

البشمهندس : لا ازاى احنا لازم نوصلك

مش حضيتك جاية ساية

تنحت شوية بعدين فهمت انه يقصد انى اكون جارة سارة

علا : اه احنا جيران

بس مافيش داعى للازعاج

البشمهندس : ولا ازعاج ولا حاجة

سارة : ماتلحش عليها يازوما

ثيبها على راحتها علشان ما تتضايقش

علا لنفسها بقى كده

طيب والله لا اركب معاكم ومش هاسيبكم من غير محرم

سارة : شكرا لذوقك يا بشمهندس

وبما انى طريقنا واحد يبقى ما فيهاش ازعاج

ومسكت ايد سارة وانا بابتسم بكل استفزاز

هاتى ايدك ياسارة واسندى عليا

علشان تعرفى تركبى العربيه

البشمهندس : طيب هسخن العيبيه




وبمجرد ما بدا يدور العربيه عرفت انها عامل اساسى

فى زيادة مشكله التلوث فى مصر

وفهمت ايه سر العاصفة الترابيه اللى هبت فجاه بدون انذار

وركبت معاهم

وماحبيتش أرخم عليهم اكتر من كده

فقررت انى اتصل على اروى اشغل نفسى عنهم شويه

علشان ما احرجهمش

علا : سلام عليكم

أروى : ازيك يا علا

فينك يا بنتى

علا : فى الدنيا

يعنى هكون فين

انتى فى البيت اعدى عليكى شويه

اروى : بعد ساعتين هكون فى البيت

علا : اعترفى يا ندله خارجة ولوحدك ومن غير ما تقولى لى

ونخرج سوا

اروى بدلع : انا مش لوحدى

علا : اه الانا بقى هتشتغل

يا بنتى هو انتى تعرفى حد فى البلد ده غيرى

اروى : اه

انا خارجة مع جوزى حبيبى

علا : حمد لله على سلامته

هو رجع امتى ؟؟

اروى : من كام يوم

علا :وانا اقول اروى اختفت ومش بتسال

من لقى احبابه يا ستى

طيب يالا اسيبك معاه

اروى : هتعدى عليا امتى

علا : بذمتك انتى عايزانى اعدى اصلا

اروى : اه طبعا

هاستناكى

علا : لا خليها مرة تانيه

وفجاة افتكرت علا اللى لمحته من شويه

حاولت تتاكد منها من غير ماتثير شكوكها

علا : طبعا ما صدقتى جه علشان تاخديه وتتفرجى على الفيلم اللى هتموتى وتشوفيه

اروى : لا يا ستى ده احنا فى وسط البلد

بنشترى هدوم للبيبى

علا : وسط البلد

اروى : اه

علا فى زيادة تاكيد : رحتى المحل اللى شفناه انا وانتى الاسبوع اللى فات

سارة : لسه ما شيين من عنده من ربع ساعة

اشترينا كل الحاجات اللى فيه

هنا ايقنت علا انها لم تتوهم


وانها رأت اروى فعلا

لكن هل من راته مع اروى هو نفسه من تظنه انه هو

تابعوا معانااااااا









هناك 13 تعليقًا:

  1. علي فكرة انت بتهزري
    تاني مرة تعمليها فينا و تسيبينا مش فاهمين حاجة طيب انا دلوقتي فرحانة فيكي انك اضايقتي لما معرفتيش هاني قال ايه لعليا في ليالي مصرية :))
    تسلم ايدك بجد و الاخ الباشمهندس ده بيكمل ثاية "سارة" خالص
    مستنيه اعرف حكاية جوز اروي شكلها فيلم كبير متتاخريش لو سمحتي

    ردحذف
  2. سلام عليكى ورحمة الله وبركاته يامنى
    انا اللى بهزر
    واللى انتى علقتينى وماعرفتش هانى هيتصل بعليا وهيروح لها ولا هيعمل ايه
    وشريف كمان هيعمل ايه لما يعرف
    بس بقى ما تفكرنيش
    بس احنا كده خالصين
    حكايه جواز اروى فى الحلقة القادة ان شاء الله
    ومش هتتاخر

    ردحذف
  3. السلام عليكم
    هايل بكل معاني الكلمة
    متابع بشدة
    دومتي بخير

    ردحذف
  4. الاستاذ:مجدى حاتم وعليكم السلام ورحمة الله وبركاته
    ربنا يكرمك على رايك المشجع
    وجزاك الله خيرا لمتابعتك
    دمت بكل خير

    ردحذف
  5. حلوة اوى ياوايز
    انا مستنية اعرف ايه اللى حصل
    ماتتأخريييييييش

    ردحذف
  6. بجد حلوة أوي كأسلوب و حوار ، مستني الباااااااقي...

    ردحذف
  7. نهى صالح السلام عليكم ورحمة الله وبركاته
    القصه حلوة بمتابعتك وتشجيعك الدائم
    وان شاء الله مش هتاخر فى الحلقة الجايه
    نهى انا حاسه انى هقرا لك قصه قريب ان شاء الله
    ماهو بعد البوست الرائع كيلو اللحمة 14جنيه خسارة جدا انك ما تحاوليش تكتب لنا قصه
    عامة انا هستنى وان شاء الله مش هستنى كتير

    ردحذف
  8. ELmostafaz
    السلام عليكم ورحمة الله وبركاته
    اولا ارحب بك معانا على صفحات المدونة
    وبشكرك على رايك فى الاسلوب والحوار
    وسعيدة بمتابعتك
    دمت بخير

    ردحذف
  9. اسلوبك كتيير رائع ياقلبي
    منتظرة معاكِ الباقي

    كوني بخير

    ردحذف
  10. ده الموضوع كبير يا وايزى

    أنا مبطلتش ضحك والصور معبره جدا :)

    طبعا بالنسبه لتعليقك لينا فى الأخر فلا تعليق

    خاصة ان قصة (هل لنا ان نعود) لسه محفوره مقالبك فيها جوايا

    من الأخر ..
    عادتك ولا هتشتريها؟

    ردحذف
  11. اسماء عبد العزيز السلام عليكم ورحمة الله وبركاته
    نورتى المدونة
    وسعيدة بمتابعتك معانا
    دمتى بخير

    ردحذف
  12. أزال المؤلف هذا التعليق.

    ردحذف
  13. مها البنا السلام عليكم ورحمة الله وبركاته
    وانا اقول المدونة منورة كده ليه
    وحشتينى وطولتى غيابك عن المدونة المرة ده
    بس ولايهمك المهم انك تكونى بخير
    ما تتخيليش انا قد فرحانة انكم لسه فاكرين هل لنا ان نعود ؟
    ربنا مايحرمنى منك ابدا
    ولا من تشجيعك الدائم ليا

    ردحذف